Renu Desai: రేణు దేశాయ్​ రెండో పెళ్లికి సిద్ధమైందా? జీవితంలో తోడు కావాలని పోస్ట్.. వీడియోలు వైరల్​

సింగిల్​ గానే..

బద్రి సినిమాతో హీరోయిన్​గా మోస్ట్ పాపులారిటీ సంపాందించుకున్నారు రేణు దేశాయ్​. ఇందులో పవన్​ కల్యాణ్ సరసన నటించగా, వాళ్లిద్దరి పెయిర్​కు మంచి రెస్పాన్స్ వచ్చింది. అయితే పవన్​ కల్యాణ్​ను పెళ్లి చేసుకున్న రేణు దేశాయ్​ 2012లో విడాకులు తీసుకున్న విషయం తెలిసిందే. ఇక అప్పటినుంచి ఆమె సింగిల్​గానే జీవితం గడుపుతోంది. ఇక ఈ మధ్యనే దర్శకురాలిగా మారి ఓ సినిమాను డైరెక్ట్​ చేశారు.

వీడియోలు చక్కర్లు..

దర్శకురాలిగా, జడ్జిగా రీ ఎంట్రీ ఇచ్చి ప్రేక్షకులను ఎంటర్​టైన్​ చేశారు. సోషల్ మీడియాలో యాక్టివ్​గా ఉండే రేణు దేశాయ్​ పలు ఫొటోలు, పోస్ట్​లతో నెటిజన్లకు టచ్​లో ఉంటారు. అయితే తాజాగా ఆమె పెట్టిన రెండు పోస్ట్​లు చర్చనీయాంశంగా మారాయి. ఆమె రెండో పెళ్లి చేసుకోబోతుందా అని అనుమానాలు వ్యక్తమవుతున్నాయి. ప్రస్తుతం ఈ వీడియోలు నెట్టింట్ల చక్కర్లు కొడుతున్నాయి.

తోడు కావాలి..

ఇందులోని ఒక వీడియోలో ''జీవితంలో అవసరం ఉన్నప్పుడు మన చేయి పట్టుకుని నడిపించే ఒక తోడు కావాలి'' అని రాసి ఉంది. అలాగే ఈ వీడియోలో రేణు దేశాయ్ ఒక ఒడ్డు పక్కన కూర్చొని ఉంటుంది. ఇక రెండో పోస్ట్​లోని వీడియోలో ''మీ సోల్​మేట్​ని వెతకడానికి ముందు మిమ్మల్ని మీరు పూర్తిగా అర్థం చేసుకోండి'' అని రాసుకొచ్చింది. దీంతో ఈ వీడియోలు వైరల్​ కావడమే కాకుండా చర్చనీయాంశంగా మారాయి.

రెండో పెళ్లిపై వార్తలు..

ఈ కామెంట్స్​ను బట్టి రేణు దేశాయ్​ రెండో పెళ్లి వైపు అడుగులు వేస్తుందా? అని చర్చించుకుంటున్నారు. అయితే ఈ విషయంపై పూర్తి క్లారిటీ రావాల్సింది. ఇదిలా ఉంటే ఇదివరకు రేణు దేశాయ్​ రెండో వివాహం చేసుకోనున్నట్లు వార్తలు వచ్చాయి. అతడితో ఎంగేజ్​మెంట్ అయిన ఫొటోలను కూడా షేర్ చేశారు. తనకు కాబోయే రెండో భర్త ముఖాన్ని దాస్తూ అతడి చేతికి ఉన్న రింగ్​ను చూపించేలా ఆ ఫొటో ఉంది.

ఐటీ ఉద్యోగం..

కాగా గతేడాది అలీతో సరదాగా షోకి వచ్చిన రేణు దేశాయ్​ తన రెండో భర్త గురించి కొన్ని విషయాలు చెప్పారు. అతడు ఓ ఐటీ కంపెనీలో మేనేజర్​గా పనిచేస్తాడని, అంతకుముందు అతడు అమెరికాలో ఉద్యోగం చేసేవాడని తెలిపారు. అతని తండ్రికి ఆరోగ్యం బాలేకపోవడంతో ఇండియాకు వచ్చి పూణెలో ఐటీ జాబ్ చేస్తున్నాడని రేణు దేశాయ్ తెలిపారు. ఇక దాని తర్వాత ఆమె రెండో పెళ్లి విషయంపై ఇప్పటికీ క్లారిటీ రాలేదు.