నా లైఫ్‌ చాలా దారుణం... పలు చీకటి కోణాలు.. మళ్లీ అలాంటి.. భోరుమని ఏడ్చిన సన్నీలియోన్

తన బయోపిక్ గురించి

తన జీవితంపై వస్తున్న కరంజిత్ కౌర్ వెబ్ సిరీస్ గురించి మాట్లాడుతూ.. నా జీవితంలో చాలా చీకటి కోణాలు. విషాదకర సంఘటనలు ఉన్నాయి. కొన్ని సంఘటనలు కాళరాత్రులగా మిగిలిపోయాయి. ఏక కాలంలో నన్ను కష్టాలు చుట్టుముట్టాయి. వాటిని మళ్లీ తలచుకోవడమంటే, చూడటమంటే నేను తట్టుకోలేను అని సన్నీలియోన్ అన్నారు. సన్నిలియోన్ అసలు పేరు కరంజిత్ కౌర్ అనే విషయం తెలిసిందే.

అనేక విషాదాలతో లైఫ్

నా జీవితంలో ఊహించని విధంగా నా తల్లి అకాల మరణం పొందారు. ఆ వెంటనే నా తండ్రి క్యాన్సర్ వ్యాధికి గురై చనిపోయారు. ఆ విషాదం నుంచి తేరుకొంటున్న సమయంలోనే పెళ్లి జరిగింది. భారత్‌లో టెలివిజన్ షో బిగ్‌బాస్‌లో పాల్గొనాలని ఆహ్వానం అందింది. ఇలా చాలా వేగంగా నా జీవితంలో అనేక మార్పులు చోటుచేసుకొన్నాయి అని సన్నీలియోన్ తన కష్ట సుఖాలను తెలిపారు.

గుర్తు చేసుకొంటే గుండె పగులుతుంది..

కొన్ని సంఘటనలను గుర్తు చేసుకొంటే గుండె పగిలిపోద్ది. అలాంటి విషయాలను మళ్లీ గుర్తు తెచ్చుకోవడం, వాటిని తెరపైన చూడాల్సి వస్తుందటే కంట్లో నీరు ఉబికి వస్తుంది. గొంతులో నుంచి దుఖం పరుగులు పెడుతుంది. కొన్ని సంఘటనలు నా భర్త చూసి తట్టుకోలేకపోతారు. నా తల్లిదండ్రులను కోల్పోవడం అతిపెద్ద విషాదం అని సన్నీలియోన్ అన్నారు.

బాలీవుడ్ నాకు దారి చూపింది

నేను విషాదంలో కూరుకుపోయినప్పుడు బాలీవుడ్ నాకు పాజిటివ్ ఎనర్జీని ఇచ్చింది. సానుకూలమైన దారిని చూపించింది. తొలి రోజుల్లో ఏదో అనుకొంటే.. మరొకటి జరిగేది. చివరకు నాకు ఇండస్ట్రీ మంచి జీవితాన్ని ప్రసాదించింది అని సన్నీలియోన్ చెప్పింది. కష్ట సమయాల్లో నా భర్త డేనియల్ వెబర్ అండగా నిలిచారు. మనోధైర్యాన్ని ఇచ్చారని ఆమె వెల్లడించింది.