హోమ్

హాలీవుడ్

యూట్యూబ్ చరిత్రలో సంచలనం 'డిస్పసిటో' వీడియో ఆల్బం. ప్రముఖ పాప్ స్టార్ లూయిస్ ఫోన్సి రూపొందించిన ఈ వీడియో ప్రపంచ వ్యప్తంగా ఎన్నో రికార్డులను బద్దలు కొట్టింది. ఇటీవలే ఈ వీడియో 5 బిలియన్ వ్యూస్ సొంతం చేసుకుని చరిత్ర సృష్టించింది. ప్రపంచ రికార్డును నమోదు చేస్తూ 5 బిలియన్ మార్కును అందుకున్న ఈ వీడియో ఉన్నట్టుండి ఇపుడు యూట్యూబ్ నుండి మాయమైంది.

ఈ వీడియో తొలగింపు హ్యాకర్ల పనే అని అనుమానిస్తున్నారు. వీడియో ప్లే చేయడానికి ప్రయత్నించగా కొందరికి ముసుగు వేసుకున్న దృశ్యాలు దర్శనమిస్తున్నాయి. ఈ వీడియో ప్రపంచ రికార్డు సాధించడంతో ఓర్వలేకనే కొందరు దీన్ని హ్యాక్ చేసి తొలగించినట్లు అనుమానిస్తున్నారు. వెంటనే రంగంలోకి దిగిన యూట్యూబ్ టీమ్ ఈ వీడియోను రీస్టోర్ చేసే ప్రయత్నం చేస్తున్నారు.

స్పానిష్ లాంగ్వేజ్ హిట్ వీడియో అయిన 'డిస్పసిటో' 2017 జనవరిలో విడుదలైంది. అతి తక్కువ కాలంలో ఇతర రికార్డులను బద్దలు కొడుతూ దూసుకెళ్లింది. ఈ వీడియో విడుదలకు ముందు గంగ్నమ్ స్టైల్, సీయూ ఎగైన్, షేప్ ఆఫ్ యూ లాంటి వీడియోలు లీడింగులో ఉండేవి. కేవలం కొన్ని నెలల వ్యవధిలోనే వీటన్నింటినీ వెనక్కి నెట్టేసింది.

టాప్ 5 పొజిషన్లో ఉన్న యూట్యూబ్ వీడియోల విషయానికొస్తే.... 5 బిలియన్ వ్యూస్‌తో 'డిస్పసిటో' మొదటి స్థానంలో, 3.5 బిలియన్ వ్యూస్‌తో 'సి యూ ఎగైన్' రెండో స్థానంలో, 3.43 బిలియన్ వ్యూస్‌తో షేప్ ఆఫ్ యూ మూడో స్థానంలో, 3.14 బిలియన్ వ్యూస్‌తో గంగ్నమ్ స్టైల్ నాలుగో స్థానంలో, 3 బిలియన్ వ్యూస్‌తో 'అప్‌టౌన్ ఫంక్' ఐదో స్థానంలో నిలిచింది.