వారిద్దరూ 'అప్పుడప్పుడు' కలసివుంటారు

ప్రముఖ పాప్ సింగర్ దివంగత మైఖేల్ జాక్సన్ సోదరి జానెట్ జాక్సన్, ప్రముఖ అమెరికన్ ర్యాపర్ జర్మెయిన్ లు ప్రేమలో వున్నారా?? అవుననే అంటున్నారు హాలివుడ్ జనాలు. అంతే కాదు వారిద్దరూ త్వరలో పెళ్లి కూడా చేసుకోబోతున్నట్టు వార్తలు వినిపిస్తున్నాయి. కానీ వారిద్దరినీ మొదటి నుండీ గమనిస్తే అప్పుడుప్పుడు మాత్రమే వారి మధ్య ప్రేమ కనిపించింది. అప్పుడప్పుడు విడిపోవడం, అప్పుడప్పుడు కలసి వుండటం. ఇదంతా చూసే వారికి వింతగా అనిపిస్తోందట. మనకు మాత్రం ఇలాంటి కథలతో వచ్చిన సినిమాలు చాలానే వున్నాయి కాబట్టి కొత్తగా అనిపించదు...రొటీన్ కథలాగే అనిపిస్తుంది.

కొన్నాళ్లు ఎంతో స్నేహంగా వున్న వీరిద్దరూ సెపెంబరు 9న విడిపోతున్నట్టు ప్రకటించారు. కానీ అంతలోనే ఇటలీలో జరిగిన ఓ పార్టీలో కలసి పాల్గొని తిరిగి కలసిపోయినట్టు చెప్పకనే చెప్పారు. ఇప్పుడు తాజాగా వీరిద్దరూ పెళ్లి చేసుకోనున్నారనే వార్తలను జర్మెయిన్ తేలిగ్గా కొట్టిపారేసాడు. తామిద్దరి మధ్య సరయిన స్నేహబంధం కూడా లేదని, అలాంటి మా ఇద్దరికీ పెళ్లి అని వస్తోన్న వార్తలు హాస్యాస్పదం అని వివరణ ఇచ్చాడు. మరి సరైన స్నేహం లేకుండానే పార్టీలకు చెట్టాపట్టాలేసుకొని తిరిగారా??? ఏమో ఆయనగారికే తెలియాలి.