సీఎంతో పెళ్లి నా తలరాత.. అలా అంటే ప్రాణం పోతుంది.. సినీ నటి రాధిక కుమారస్వామి

కుమారస్వామిని పెళ్లి చేసుకోవడంపై

కుమారస్వామితో పెళ్లి తర్వాత జీవితంలో ఎలాంటి మార్పులు లేవు. పెళ్లికి ముందు సినీ నటిగా పిలిచేవారు. ఇప్పుడు రాజకీయ నాయకుడి భార్య అని పిలుస్తున్నారు. రాజకీయ నేతను పెళ్లి చేసుకోవడం నా తలరాత. అలా పెళ్లి చేసుకోవడం ద్వారా తప్పు చేసిన ఫీలింగ్ కలుగడం లేదు అని రాధిక కుమారస్వామి అన్నారు. అయితే తాము విడిపోయామని వస్తున్న వార్తల్లో వాస్తవం లేదు అని అన్నారు.

అంతా దేవుడి తలరాత

రాజకీయ నేత కుమారస్వామిని పెళ్లి చేసుకోవడం ద్వారా సినిమాలకు దూరమయ్యాను. ఎవరినీ, ఎప్పుడు, ఎక్కడ పెళ్లి చేసుకోవడమనేది మన చేతిలో ఉండదు. అదంతా దేవుడు రాసిన తలరాత. ఆయనతో నా వైవాహిక జీవితం సంతోషంగా సాగుతున్నది. నాకు ఎలాంటి తప్పు చేశాననే భావన ఎన్నడూ కలుగలేదు అని రాధిక కుమారస్వామి తెలిపారు.

కుమారస్వామి పేరు పలకకపోవడంపై

తాను కుమారస్వామి పేరును పలకకపోవడంపై కూడా వివరణ ఇచ్చారు. భారతీయ సంప్రదాయాలు, సంస్కృతికి సంబంధించినంత వరకు భర్త పేరును భార్య పలుకరు. ఒకవేళ అలా పలికితే ఆయుష్షు తగ్గిపోతుంది. అందుకే నేను ఆయన పేరు చెప్పడానికి ఇష్టపడను. ఇంటర్వ్యూలో నా భర్త పేరు చెప్పడానికి ఒప్పుకోను అని రాధిక కుమారస్వామి చెప్పారు.

సినిమాల్లో మళ్లీ బిజీ, బిజీగా

ఇప్పటికీ రాధిక, కుమారస్వామి రిలేషన్ విషయంపై మీడియాలో అనేక అనుమానాలు తలెత్తుతుంటాయి. వారిద్దరికి షమిక అనే కూతురు ఉంది. ఈ మధ్యకాలంలో వారిద్దరు కలిసి ఎక్కడ కనిపించకపోవడంతో అనేక సందేహాలు వ్యక్తమయ్యాయి. దాంతో వారి మధ్య బ్రేకప్ జరిగిందనే రూమర్లు షికారు చేశాయి. అయితే వారిద్దరూ ఎన్నడూ ఆ వార్తను ఖండించకపోవడం గమనార్హం. కుమారస్వామి రాజకీయాలతో బిజీగా మారడంతో రాధిక మళ్లీ సినిమాల్లోకి రీఎంట్రీ ఇచ్చింది.