రాక్‌స్టార్‌కు ఫోజులెక్కువ.. నోరు జారిన రష్మిక మందన.. దుమ్ము దులిపిన ఫ్యాన్స్..

ఎవరు ఫోజులు కొడుతారంటే..

కన్నడలో ఇటీవల విడుదలై సంచలన విజయం సాధించిన చిత్రాల్లో కిరిక్ పార్టీ ఒకటి. ఆ చిత్రంలో శాన్వీ అనే పాత్రను పోషించిన కన్నడ భామ రష్మిక‌తో మీడియా చిట్‌చాట్ నిర్వహించింది. కన్నడ సీమలో హీరోలపై తనకు ఉన్న అభిప్రాయాలను వెల్లడించాలని రష్మిక కోరింది. గొప్పలు కొట్టే.. ఫోజులు కొట్టే హీరో ఎవరు అనే ప్రశ్నకు సమాధానమిచ్చిన రష్మిక వివాదంలో కూరుకుపోయింది. తోటి నటుడిపై అలాంటి వ్యాఖ్యలు చేస్తావా అంటూ ఫ్యాన్స్ కసురుకున్నారు.

యష్ ఎక్కువ ఫొజులు కొడుతాడు..

ఫోజులు ఎక్కువగా కొట్టే నటుల్లో రాక్‌స్టార్ యష్ ముందుంటాడు అని రష్మిక మందన తన అభిప్రాయాన్ని తెలిపింది. అక్కడే ఆమె చిక్కుల్లో పడింది. ఏంటీ మా హీరోను అలా అంటావా? నీ తాట తీస్తాం అని సోషల్ మీడియాలో ఫ్యాన్స్ దుమ్ము దులిపారు. దాంతో అందాల భామ కంగుతిన్నది. పరిస్థితి అదుపు తప్పుతుందని భావించిన ముద్దుగమ్మ చేసేదేమీ లేక క్షమాపణలు చెప్పింది. అప్పటికే అభిమానుల వాయించిన వాయింపులకు అమ్మడి బుగ్గలు ఎర్రబారాయి.

ముందు నేను నిరాకరించా

కన్నడ ఫిలిం ఇండస్ట్రీలో ఫోజులు, గొప్పలకు పోయే హీరో ఎవరనే ప్రశ్నను మీడియా అడిగింది. అయితే నేను చెప్పడానికి, ఆ ప్రశ్నను దాటవేయడానికి నిరాకరించాను. అయితే బలవంతం చేయడంతో యష్ పేరు చెప్పాను. అది ఇంత పెద్ద వివాదంగా మారుతుందని నేను అనుకోలేదు అని రష్మిక అన్నారు.

క్షమాపణ చెప్తున్నా..

ఒకవేళ ఎవరైనా నా వ్యాఖ్యలతో ఇబ్బంది పడినా.. ఎవరి మనోభావాలను దెబ్బ తీసినా గానీ అందుకు నేను క్షమాపణ చెప్తున్నాను అని రష్మిక ఓ ప్రకటనను జారీ చేసింది. ఆ ప్రకటనను సోషల్ మీడియాలోనూ, ముఖ్యంగా ఫేస్‌బుక్‌లో పోస్ట్ చేసింది. కేవలం వినోదం కోసం చేసిన ఇంటర్వ్యూ మాత్రమే.. దానిని సీరియస్‌గా తీసుకోవద్దని యష్ ఫ్యాన్స్‌ను కోరింది.

రష్మికను వదిలేయండి..

ఈ వివాదం ముదిరిపోతున్నదని గ్రహించిన హీరో యష్ కూడా రంగంలోకి దిగాడు. రష్మిక తనపై ఉద్దేశపూర్వకంగా వ్యాఖ్యలు చేయలేదు. కావున ఆమెను ఈ వివాదం నుంచి విముక్తి చేయాలని తన ఫ్యాన్స్‌ను యష్ కోరాడు. రష్మిక, నేను మంచి స్నేహితులం. మా మధ్య ఎలాంటి గొడవలు, అభిప్రాయ భేదాలు లేవు అని ఆయన వివరణ ఇచ్చారు.