హోమ్

శాండిలీవూడ్

కన్నడ చిత్ర పరిశ్రమలో వరుస విజయాలను అందుకుంటూ టాప్ హీరోగా వెలుగొందుతున్నాడు స్టైలిష్ హీరో యశ్. గతంలో ఎన్నో సూపర్ హిట్ చిత్రాల్లో నటించిన అతడు.. ఆ పరిశ్రమ వరకే పరిమితం అయ్యాడు. ఈ నేపథ్యంలో ప్రశాంత్ నీల్ తెరకెక్కించిన 'KGF Chapter 1' అన్ని భాషల్లోనూ భారీ విజయాన్ని దక్కించుకోవడంతో, అతడు కూడా దేశ వ్యాప్తంగా గుర్తింపు తెచ్చుకున్నాడు. ఈ మూవీలో అతడి యాక్టింగ్, బాడీ లాంగ్వేజ్, స్టైల్స్‌కు దక్షిణాదితో పాటు ఉత్తరాది ప్రేక్షకులు సైతం ఫిదా అయిపోయారు.

'KGF Chapter 1' సూపర్ డూపర్ హిట్ అవడంతో దానికి కొనసాగింపుగా 'KGF Chapter 2'ను తెరకెక్కిస్తున్నారు. సినీ ప్రియుల అంచనాలకు ఏమాత్రం తీసిపోకుండా భారీ బడ్జెట్, హై టెక్నికల్ వ్యాల్యూస్‌తో ఈ సినిమాను రూపొందిస్తున్నారు. ఇప్పటికే దీని షూటింగ్ చాలా వరకు పూర్తయింది. మిగిలిన క్లైమాక్స్ పార్ట్‌ను హైదరాబాద్‌లో చిత్రీకరిస్తున్నారు. ఇందుకోసం చిత్ర హీరో సహా యూనిట్ మొత్తం నగరంలోనే ఉంది. ఆ తర్వాత సుదీర్ఘంగా సాగే షెడ్యూల్‌లో క్లైమాక్స్ ఫైట్ సహా కొన్ని కీలక సన్నివేశాలను షూట్ చేయనున్నారు.

ఈ సినిమా పట్టాలపై ఉండగానే యశ్ మరో పాన్ ఇండియా మూవీని లైన్‌లో పెట్టేశాడని తాజాగా ఓ న్యూస్ బయటకు వచ్చింది. కన్నడంలో 'ముఫ్తీ' అనే బ్లాక్ బస్టర్ హిట్ చిత్రాన్ని తెరకెక్కించిన నార్తాన్‌తో ఈ ప్రాజెక్టు చేయబోతున్నాడట. దీన్ని కూడా కన్నడం, తమిళం, మలయాళం, తెలుగు, హిందీ భాషల్లో రూపొందించనున్నారని సమాచారం. నార్తాన్ ప్రస్తుతం శింబు హీరోగా 'ముఫ్తీ' తమిళ రీమేక్‌ చేస్తున్నారు. ఇది జనవరి కల్లా పూర్తి చేసి, వచ్చే ఏడాది ప్రథమార్ధం నుంచి యశ్ సినిమాను పట్టాలెక్కించనున్నారని సమాచారం.