హోమ్

శాండిలీవూడ్

కన్నడ చిత్ర పరిశ్రమ నుంచి రూపొంది దేశ వ్యాప్తంగా విడుదలైన అన్ని భాషల్లోనూ సూపర్ డూపర్ హిట్‌గా నిలిచిన చిత్రం 'KGF Chapter 1', శాండిల్‌వుడ్ సూపర్ స్టార్ యశ్ నటించిన ఈ సినిమా కలెక్షన్ల పరంగానూ దుమ్ము దులిపేసింది. అంతేకాదు, ఆ మధ్య ప్రకటించిన జాతీయ చలన చిత్ర అవార్డుల్లో బెస్ట్ యాక్షన్ విభాగంలో చోటు దక్కించుకుంది. ఇండియన్ సినిమాపై ఇంతటి ప్రభావాన్ని చూపిన ఈ సినిమాకు సీక్వెల్ రూపొందిస్తున్నాడు స్టైలష్ డైరెక్టర్ ప్రశాంత్ నీల్.

మొదటి పార్ట్ సూపర్ డూపర్ హిట్ అవడంతో 'KGF Chapter 2' పైనా ఆసక్తి పెరిగిపోయింది. సినీ ప్రియుల అంచనాలకు ఏమాత్రం తీసిపోకుండా భారీ బడ్జెట్, హై టెక్నికల్ వ్యాల్యూస్‌తో ఈ సినిమాను రూపొందిస్తున్నారు. ఇప్పటికే దీని షూటింగ్ చాలా వరకు పూర్తయింది. మిగిలిన క్లైమాక్స్ పార్ట్‌ను హైదరాబాద్‌లో చిత్రీకరించనున్నారు. ఇందుకోసం చిత్ర హీరో సహా యూనిట్ మొత్తం గురువారం నగరానికి చేరుకోనుంది. ఆ తర్వాత సుదీర్ఘంగా సాగే షెడ్యూల్‌లో క్లైమాక్స్ ఫైట్ సహా కొన్ని కీలక సన్నివేశాలను షూట్ చేయనున్నారు.

'KGF Chapter 2' అనే పేరుతో రాబోతున్న ఈ సినిమాను.. మొదటి పార్టుకు మించి రూపొందిస్తున్నాడు దర్శకుడు ప్రశాంత్ నీల్. దీన్ని కూడా పాన్ ఇండియా రేంజ్‌తో తెరకెక్కిస్తున్నాడు. అందుకే ఈ ప్రతిష్టాత్మక చిత్రంలో బాలీవుడ్ నటులు సంజయ్ దత్, రవీనా టాండన్ సహా ఎంతో మంది ప్రముఖులు నటిస్తున్నారు. శ్రీనిధి శెట్టి హీరోయిన్‌గా చేస్తోంది. ఇక, ఈ సినిమా రిలీజ్ విషయానికొస్తే.. దీన్ని మొదట 2021 సంక్రాంతికి విడుదల చేయాలని భావించారు. కానీ, కరోనా ప్రభావంతో దాన్ని వాయిదా వేసినట్లు తెలుస్తోంది.