నగ్నంగా నటించు, లేదా రూ. 5 లక్షలు కట్టు.. మహిళా దర్శకురాలిపై కేసు

కెరీర్ ప్రారంభంలో..

సినీ ఇండస్ట్రీలో క్యాస్టింగ్ కౌచ్ ను యువతులే కాదు యువకులు కూడా ఎదుర్కొన్నారు. అప్పట్లో రణ్ వీర్ సింగ్ వంటి తదితర హీరోలు తమ కెరీర్ ప్రారంభంలో ఇలాంటి క్యాస్టింగ్ కౌచ్ ను ఎదుర్కొన్నట్లు పలు సమావేశాల్లో చెప్పుకొచ్చారు. అయితే తాజాగా ఓ బుల్లితెర నటుడు ఇలాంటి సంఘటననే ఫేస్ చేశాడు.

ఎప్పటికైనా సినిమాల్లో..

బుల్లితెరకు చెందిన ఓ నటుడు ఎప్పటికైనా సినిమాల్లో రాణించాలనుకున్నాడు. ఈ క్రమంలోనే సినిమాలో నటించేందుకు ప్రయత్నాలు మొదలుపెట్టాడు. ఒక మూవీలో నటించే అవకాశం వచ్చింది. తమ వద్ద సినిమా ఆఫర్ ఉందని, మంచి పారితోషికం కూడా ఇస్తామని కేరళకు చెందిన ఓ మహిళా డైరెక్టర్ అతన్ని సంప్రదించింది.

ఆనందంలో ఏం చదవకుండానే..

అయితే ముందుగా అగ్రిమెంట్ పై సంతకం చేయాల్సిందిగా సదరు డైరెక్టర్ తెలిపిందట. తనకు సినిమా అవకాశం వచ్చినందన్న ఆనందంలో ఏం చదవకుండానే ఒప్పందపత్రంపై సంతకం చేశాడు ఆ నటుడు. తీరా షూటింగ్ మొదలయ్యాక నగ్నంగా నటించమనడంతో అతను షాక్ అయ్యాడు.

నన్ను ఓ గదిలోకి తీసుకెళ్లారు..

ఈ సంఘటన గురించి ''అది నాకు తొలి షూటింగ్. నేను అగ్రిమెంట్ చదవకుండానే సంతకం పెట్టాను. వారితో కలిసి షూటింగ్ కు వెళ్లాక నన్ను ఓ గదిలోకి తీసుకెళ్లారు. ఇది అడల్ట్ మూవీ, నగ్నంగా నటించాలని చెప్పారు. నేను కుదరదన్నాను. అగ్రిమెంట్ పై సైన్ చేశావ్, కాబట్టి నటించాల్సిందే అన్నారు. అగ్రిమెంట్ క్యాన్సిల్ కావాలంటే రూ. 5 లక్షలు కట్టుమని బెదిరించారు.

తప్పించుకోలేకపోయాను..

మేము వెళ్లింది ఒక మారుమూల ప్రాంతం. కాబట్టి అక్కడి నుంచి తప్పించుకోలేకపోయాను. ఇప్పుడు ఆ మూవీ ఓటీటీలో విడుదల కాబోతుంది. అది గనుక విడుదలైతే నా తల్లిదండ్రులకు, స్నేహితులకు నా మొహం చూపించుకోలేను. నాకు ఇక చావే దిక్కు'' అంటూ పోలీసులకు ఫిర్యాదు చేశాడు సదరు నటుడు.

పోలీసుల విచారణ..

బుల్లితెర నటుడు ఇచ్చిన ఫిర్యాదు మేరకు పోలీసులు కేసు నమోదు చేసుకుని విచారణ జరుపుతున్నారు. అనంతరం ఆ మహిళా డైరెక్టర్ ను విచారించనున్నట్లు తెలుస్తోంది. మరి ఆ సినిమా ఓటీటీలో విడుదలవ్వకుండా పోలీసులు అడ్డుకుంటారా అనేది తెలియాల్సి ఉంది.