మరో ట్యూన్ కాపీ కొట్టి దొరికేసిన థ‌మ‌న్.. మ మ మహేషా ఆ పాటకు కాపీనా?

సర్కారు వారి పాట

సూపర్ స్టార్ మహేష్ బాబు నటిస్తున్న తాజా చిత్రం సర్కారు వారి పాట. పరశురామ్ దర్శకత్వంలో తెరకెక్కుతున్న ఈ సినిమాలో కీర్తి సురేష్ హీరోయిన్ గా నటిస్తోంది. గీత గోవిందం సినిమా తర్వాత చాలా గ్యాప్ తీసుకున్న పరశురామ్ ఈ కథ సిద్ధం చేసుకోవడంతో సరిలేరు నీకెవ్వరు సినిమా హిట్ అందుకున్న మహేష్ బాబు సినిమా వెంటనే ఒప్పుకున్నారు.

మే 12వ తేదీన

బ్యాంకింగ్ ఫ్రాడ్స్ నేపథ్యంలో తెరకెక్కుతున్న ఈ సినిమా ఇప్పటికే అనేక సార్లు వాయిదా పడింది. అనేక సార్లు వాయిదా పడిన ఈ సినిమాను మే 12వ తేదీన ప్రేక్షకుల ముందుకు తీసుకువచ్చేందుకు మేకర్స్ సిద్ధమయ్యారు. అందులో భాగంగానే మే 7వ తేదీన హైదరాబాద్ యూసఫ్ గూడ పోలీస్ పరేడ్ గ్రౌండ్ లో పెద్ద ఎత్తున ప్రీ రిలీజ్ ఈవెంట్ నిర్వహించారు. ఈ ఈవెంట్ కు సుకుమార్, బుచ్చిబాబు, గోపీచంద్ మలినేని, వంశీ పైడిపల్లి, అనిల్ రావిపూడి, మెహర్ రమేష్ వంటి దర్శకులు హాజరై తమ ఆశీస్సులు అందించారు.

సొంత ట్యూన్ ను

అంతా బాగానే ఉంది కానీ ఈ సినిమాకు సంబంధించిన ఒక పాటను ఈ వేడుకలో సుకుమార్ విడుదల చేశారు. థ‌మ‌న్ సంగీతం అందించిన ఆ పాట అందరినీ ఆకట్టుకుంది. మహేష్ పేరుతో మ మ మహేషా అంటూ సాగుతున్న ఆ సాంగ్ మీద కాపీ ఆరోపణలు వచ్చాయి. సాధారణంగా ఇప్పటివరకు థ‌మ‌న్ వేరే వాళ్ల పాటలు చూసి కాపీ కొట్టాడు అంటూ ఆరోపణలు వచ్చాయి కానీ మొట్టమొదటిసారి ఆయన తన సొంత ట్యూన్ ను మళ్ళీ కాపీ చేశాడు అంటూ ప్రచారం జరుగుతోంది

కాపీ కొట్టేశాడు అంటూ

ఇక మ మ మహేష్ అనే సాంగ్ గతంలో అల్లు అర్జున్ హీరోగా బోయపాటి దర్శకత్వంలో తెరకెక్కిన సరైనోడు సినిమా టైటిల్ సాంగ్ లాగా ఉందని కొంతమంది అభిప్రాయపడుతున్నారు. ట్యూన్ కూడా కొంచెం దగ్గరగా ఉండడంతో ఇంకేముంది, థ‌మ‌న్ ఈ పాటను కూడా కాపీ కొట్టేశాడు అంటూ పెద్ద ఎత్తున కామెంట్లు చేస్తున్నారు. అయితే థ‌మ‌న్ ప్రస్తుతం వరుస సినిమాలు చేస్తూ అధికభాగం హిట్లు అందుకుంటూ ముందుకు వెళ్తున్నారు.

కాపీ మరక

ఈ నేపథ్యంలో ఆయన మీద ఈ కాపీ మరకల ప్రభావం పడే అవకాశాలు తక్కువే. కానీ ఆన్లైన్ లో వస్తున్న ట్రోల్స్ ని పట్టించుకుని తన భవిష్యత్తు సినిమాలలో ఇలాంటి అవాంతరాలు మళ్లీ ఎదురవకుండా ఎంతవరకు చూసుకుంటాడు అనేది కూడా ముఖ్యమైన విషయనే చెప్పాలి. ప్రస్తుతానికి థ‌మ‌న్ చేతిలో చాలా పెద్ద పెద్ద సినిమాలు ఉన్నాయి.