మీ ప్రశ్నలకు సమాధానం చెప్పే పాట.. రాహుల్ రవీంద్రన్ కామెంట్స్

కాదలే కాదలే అనే పాట ఎంతమంది విని ఉంటారో లెక్క పెట్టలేం. విజయ్ సేతుపతి, త్రిష జంటగా వచ్చిన 96 సినిమా తమిళ నాట ఓ సంచనలం సృష్టించింది. సినిమా అంతా ఒకెత్తు అయితే.. అందులోని కాదలే కాదలే సాంగ్ మరో ఎత్తు. భాషతో సంబంధం లేకుండా ప్రతీ ఒక్కరినీ ఆకట్టుకుంది. ఎవరి ఫోన్‌ చూసినా అదే రింగ్ టోన్. సాంగ్ ఆఫ్ ది ఇయర్‌గా కూడా ఆ పాట నిలిచింది.

గోవింద్ వసంత్ అందించిన ఆ పాటకు విజయ్ సేతుపతి, త్రిష నటించిన విధానం, తెరకెక్కించిన విధానం ఓ ఫీల్‌లోకి తీసుకెళ్తాయి అందర్నీ. అంతటి మ్యాజిక్ క్రియేట్ చేసిన కాదలే పాట తెలుగులోనూ రాబోతోంది. తమిళంలో అంతటి ఘన విజయాన్ని సొంతం చేసుకున్న ఈ సినిమాను తెలుగులో జానుగా రీమేక్ చేస్తోన్న సంగతి తెలిసిందే. ఇప్పటికే విడుదల చేసిన పోస్టర్స్, సాంగ్ ఓ రేంజ్‌లో వైరల్ అయ్యాయి.

తాజాగా ఊహలే అనే పాటను నేడు సాయంత్రం ఐదు గంటలకు రిలీజ్ చేయబోతోన్నట్లు ప్రకటించారు. ఈ పాట కాదలే పాటను మరిపించేలా ఉంటుందని, ఆల్రెడీ పాటను వినేశానని రాహుల్ రవీంద్రన్ సోషల్ మీడియాలో పేర్కొన్నాడు. ఇది కచ్చితంగా అందర్నీ ఆకట్టుకుంటుంది.. మీక ఎదురయ్యే ఎన్నో ప్రశ్నలకు సమాధానంగా ఈ పాట ఉంటుందని చెప్పుకొచ్చాడు. జాను చిత్రం ఫిబ్రవరి 7న విడుదల కాబోతోంది.