‘కొబ్బరిమట్ట’తో సంపూ బాక్సాఫీస్ బరిలో దూకుతున్నాడు.. డాన్స్ వీడియో కేక!

'హృదయ కాలేయం' సినిమాతో టాలీవుడ్లో తనకంటూ ప్రత్యేక గుర్తింపు తెచ్చుకున్న సంపూర్ణేష్ బాబు త్వరలో 'కొబ్బరి మట్ట'తో ప్రేక్షకులపై వినోదాత్మక దాడి చేయబోతున్నాడు. ఈ సినిమాలో సంపూ త్రిపాత్రాభినయం చేస్తుండటం గమనార్హం.

గత కొన్ని రోజులుగా వాయిదాల మీద వాయిదా పడుతూ వస్తున్న ఈ చిత్రం ఎట్టకేలకు రిలీజ్ డేట్ ఖరారు చేసుకుంది. ఆగస్టు 2న విడుదల చేసేందుకు ప్లాన్ చేస్తున్నారు. ఈ మేరకు డేట్ ఖరారు చేస్తూ సంపూ డాన్సింగ్ వీడియో ఒకటి వదిలారు.

'అ.. ఆ.. ఇ.. ఈ' అంటూ సాగే ఈ పాటలో సంపూర్ణేష్ బాబు తనదైన స్టెప్పులతో అదరగొట్టాడు. సోషల్ మీడియాలో ఈ వీడియో వైరల్ అయింది. 'కొబ్బరి మట్ట' మూవీపై హైప్ పెరగడానికి ఈ ఒక్కసాంగ్ చాలు అనే అభిప్రాయాలు వ్యక్తం అవుతున్నాయి.

కొబ్బరి మట్ట చిత్రంలో సంపూ.. పెదరాయుడు, పాపారాయుడు, ఆండ్రాయిడ్ ఇలా మూడు విభిన్నమైన పాత్రలలో కనిపించనున్నాడు. ఇప్పటికే ఈ పాత్రలకు సంబంధించిన లుక్స్ కూడా విడుదలవ్వగా మంచి స్పందన వచ్చింది. ఈ సినిమా రూపక్ రొనాల్డ్‌సన్ దర్శకత్వంలో తెరకెక్కుతోంది. కమ్రన్ సంగీతం అందించాడు.

ఈ సినిమాలో సంపూ... కామెడీ, యాక్షన్, కోపం, సెంటిమెంట్ ఇలా అన్ని రసాలు పండించి ప్రేక్షకులను మెప్పించబోతున్నాడట. 'హృదయ కాలేయం' సినిమాను మించిపోయేలా సంపూ అలరిస్తారని చిత్ర బృందం చెబుతోంది.