‘మా’లో మళ్లీ ఎన్నికల రచ్చ మొదలైంది: జీవిత రాజశేఖర్‌తో రంగంలోకి నరేష్!

ఎన్నికలు కోరుకోం కానీ...

‘మా'లో సాధారణంగా ఎన్నికలు కోరుకోం. అందరం ఒకటే కుటుంబం. గతంలో ఒకటి రెండు సార్లు ఎన్నికలు జరిగాయి. భారతదేశం అతిపెద్ద ప్రజాస్వామ్యం. కాబట్టి ప్రజాస్వామ్య బద్దంగా ఆలోచనలు వేరైనపుడు, మెంబర్స్ అభిప్రాయం బట్టి ఎన్నికల ద్వారా ఎవరు అధ్యక్షుడిగా ఉండాలని నిర్ణయించబడుతుంది. ఒక టర్మ్ ఒకరు మాత్రమే చేయాలని అందరి నిర్ణయం మేరకు గత టర్మ్ రాజేంద్రప్రసాద్ తన పదవికాలం అయిపోగానే తప్పుకున్నారు. శివాజీ రాజాను ఏకగ్రీవంగా ఎన్నుకున్నాం. మళ్లీ ఒకసారి శివాజీ రాజా అధ్యక్షుడిగా ఉంటానంటున్నాడు. అందుకే మేము ఎన్నికలు పెట్టాలని కోరుతున్నాం... అని నరేష్ తెలిపారు.

అందుకే నేను పోటీ చేస్తున్నాను

వందల మంది మెంబర్స్ నాకు ఫోన్ చేసి ఒక్క టర్మ్ నన్ను చేయాలంటున్నారు. మీ కుటుంబం లక్షల రూపాయలు డొనేట్ చేయడమే కాకుండా ఎప్పుడూ మాకు అండగా ఉంది. మిమ్మల్ని ఒక్కసారి ‘మా' అధ్యక్షుడిగా చూడాలని కోరుతున్నారు. నేనెప్పుడూ పదవుల కోసం పాకులాడేలేదు. పని కోసం పాకులాడతాను. ఈ టర్మ్ లో అందరి నిర్ణయం మేరకు సరే అని అంగీకరించాను. పెద్దల అందరి అశీర్వాదం ఉంది. అందరూ వెంట ఉన్నామంటున్నారు. ఇప్పటికీ కూడా యూనానిమస్ అనేది మేము కోరుకుంటున్నాం. వారు కూడా పోటీ చేస్తామంటున్నారు కాబట్టి ఎన్నికలు తప్పడం లేదని నరేష్ తెలిపారు.

వివాదాల జోలికి పోవాలనుకోవడం లేదు

ఇప్పటి వరకు జరిగిన విషయాల గురించి మేము మాట్లాడదలుచుకోలేదు. మాకు ఎలాంటి యుద్దాలు, గొడవలు, కాంట్రవర్సీలకు అవసరం లేదు. నా కోరిక మేరకు జీవిత రాజశేకర్ పోటీ చేయడానికి ఒప్పుకున్నారు.

మాకే బలం ఎక్కువగా ఉంది

‘మా' మెంబర్స్ చాలా మంది మద్దతు మాకు ఉంది. ఒక అద్భుతమైన మేనిఫెస్టోతో మా ప్యానెల్ ముందుకు వస్తోంది. మా ప్యానెల్ లోకి అలీ, శివ బాలాజీ ఇలా చాలా మంది ప్రముఖులు వచ్చారు. త్వరలో అన్ని విషయాలు ప్రెస్ మీట్ పెట్టి వెల్లడిస్తాం. ఎన్నికల తేదీ మార్చి 10.. ఉదయం 9 గంటల నుంచి సాయంత్రం 5 గంటల వరకు ఎన్నికలు జరుగుతాయి అని నరేష్ తెలిపారు.