కవర్ పేజీకెక్కిన ఐష్ అందాలు...

By Staff

Published: Wednesday, March 11, 2026, 18:05 [IST]

మొత్తానికి "వోగ్" ప్రధాన సంచికలో దర్శనమిచ్చిన ప్రియాంక చోప్రా, దీపికా పడుకునే, బిపాస బసు, ప్రీతి జింటా వంటి అందాల భామల సరసన ఇప్పుడు ఐశ్వర్యారాయ్ కూడా చేరింది. ప్రముఖ ఫ్యాషన్ అండ్ లైఫ్‌స్టైల్ మ్యాగజైన్ "వోగ్" అక్టోబర్ ప్రధాన సంచికలో ఈ అందం చోటు చేసుకుంది. మాజీ ప్రపంచ సుందరి, అమితాబచ్చన్ కోడలు ఐశ్వర్యారాయ్ కనిపించటంతో ఈ కవర్ పేజీకే ఓ అందమొచ్చినట్లు అందరూ ఫీలవుతున్నారు. అందమైన తెలుపు దుస్తులతో ఈ సుందరి సంచిక ప్రధాన పేజీలో ప్రపంచ అభిమానులకు దర్శనమిస్తోంది. దీనికి సంబంధించిన ఫోటో షూట్ కోసం ఐశ్వర్యారాయ్ గత నెల జర్మనీలో కొన్ని రోజులు గడిపింది.

ఐష్‌ ఫోటో సెషన్స్‌ను ఫ్యాషన్ ఫోటోగ్రాఫర్ ఫారూఖ్ ఛోటియా చేపట్టారు. జర్మనీకి ఫోటో సెషన్స్ కోసం వెళ్లిన ఐశ్వర్యారాయ్‌కు ఎన్నో ఆటంకాలు ఎదురయ్యాయి. ఇందులో భాగంగా, జర్మనీకి ఐష్ చేరుకోగానే అనారోగ్యం బారిన పడింది. దీనితో ఫోటో సెషన్ అక్టోబర్ సంచికకు వాయిదా పడింది. మరోవైపు... ప్రముఖ బాలీవుడ్ కాస్ట్యూమ్ డిజైనర్, "వోగ్" మ్యాగజైన్ ఫ్యాషన్ డైరక్టర్ అయిన అనితా షరాఫ్ అడజానియా ఇటీవలే గర్భం ధరించింది. దీనితో ఆమె డెలివరీకి ముందే కాస్ట్యూమ్స్ డిజైన్ లండన్‌లోనే ముగించాలని ఐశ్వర్యారాయ్‌పై ఒత్తిడి పెరిగింది. ఎన్ని ఆటంకాలు ఎదురైనా ఐష్ "వోగ్" ఫోటో సెషన్‌ విజయవంతంగా పూర్తయింది.

More from Filmibeat