జాక్‌పాట్ కొట్టేసిన ప్లాప్ డైరెక్టర్.. అఖిల్ కోసం రంగంలోకి దిగిన అల్లు అరవింద్!

ప్లాప్ డైరెక్టర్‌తో

అఖిల్ తదుపరి చిత్రం గీత గోవిందం దర్శకుడు పరుశురాంతో కానీ, బొమ్మరిల్లు దర్శకుడు భాస్కర్ తో కానీ ఉండబోతున్నట్లు ఇటీవల వార్తలు వచ్చాయి. తాజాగా ఆ వార్తలు నిజమయ్యాయి. బొమ్మరిల్లు భాస్కర్ దర్శత్వంలో అఖిల్ నటించనుండడం దాదాపుగా ఖరారయింది. అప్పుడే ప్రీ ప్రొడక్షన్ పనులు కూడా ప్రారంభమైనట్లు సమాచారం. ఈ చిత్రం క్రేజీ నిర్మాణ సంస్థ గీత ఆర్ట్స్ లో తెరకెక్కబోతోంది.

అద్భుత అవకాశం

బొమ్మరిల్లు చిత్రంతో బంపర్ హిట్ కొట్టిన భాస్కర్ అందరి దృష్టిని ఆకర్షించాడు. భాస్కర్ తెరకెక్కించిన చివరి చిత్రం ఒంగోలు గిత్త. 2013లో విడుదలైన ఈ చిత్రం డిజాస్టర్ కావడంతో భాస్కర్ సినిమాల నుంచి కనుమరుగైపొయ్యాడు. ఎట్టకేలకు అతడికి ఓ అవకాశం వచ్చింది. అఖిల్ హీరో, గీత ఆర్ట్స్ నిర్మాణం.. తనని తాను నిరూపించుకునేందుకు భాస్కర్ కు ఇంతకంటే అద్భుత అవకాశం రాదనే చెప్పాలి. అఖిల్ కూడా ఫస్ట్ హిట్ కోసం ఎదురుచూస్తున్నాడు.

రంగంలోకి అల్లు అరవింద్

అఖిల్ కు విజయాన్ని అందించేందుకు అల్లు అరవింద్ రంగంలోకి దిగారు. ఈ చిత్రానికి ఆయన సమర్పకుడిగా వ్యవహరిస్తాడట. బన్నీ వాసు నిర్మాత. గోపి సుందర్ సంగీతం అందించబోతున్నట్లు తెలుస్తోంది. బొమ్మరిల్లు, పరుగు, ఆరెంజ్ లాంటి ప్రేమ కథలు తెరకెక్కించిన భాస్కర్ అఖిల్ కోసం ఎలాంటి కథ సిద్ధం చేశాడనే ఆసక్తి నెలకొంది.

వేసవిలో ప్రారంభం

మార్చిలో ఈ చిత్రాన్ని లాంచ్ చేసి ఏప్రిల్ లో షూటింగ్ ప్రారంభిస్తారట. నవంబర్ లో విడుదల చేసేందుకు ప్లాన్ చేస్తున్నట్లు తెలుస్తోంది. భాస్కర్ తర్వాత అఖిల్ దర్శకుల జాబితాలో పరుశురాం, హీరో ఆది పినిశెట్టి సోదరుడు సత్య ప్రభాస్ ఉన్నట్లు తెలుస్తోంది. పరశురాం, సత్యప్రభాస్ ఇద్దరూ అఖిల్ కోసం కథ రెడీ చేసి సిద్ధంగా ఉన్నారట. కానీ అఖిల్ ముందుగా బొమ్మరిల్లు బాక్సర్ దర్శత్వంలో నటించేందుకు ఆసక్తి చూపుతున్నాడు.