షారుక్ వ్యాఖ్యలపై ప్రశ్న: మీడియా మైకులను తోసేసిన నాగార్జున

హైదరాబాద్: దేశంలో మత అసహనం పెరుగుతోందన్న వ్యాఖ్యలపై స్పందించేందుకు నాగార్జున నిరాకరించారు. ఈ విషయమై ఆయన్ను మీడియా వారు ప్రశ్నించగా సమాధానం ఇవ్వడానికి ఇష్టపడని ఆయన మీడియా మైకులను తోసుకుంటూ వెళ్లిపోయారు.

షారూక్‌ ఖాన్‌ నిన్న తన 50వ పుట్టిన రోజువేడుకలను జరుపుకున్నారు. ఈ సందర్భంగా ఆయన దేశంలో పెరుగుతున్న 'మతపరమైన అసహనం'పై మాట్లాడారు. ఈ విషయంలో రచయితలు అవార్డులు వెనక్కి ఇవ్వడాన్ని ఆయన స్వాగతించారు.

ఈ నేపథ్యంలో మీడియాకు తారసపడ్డ నాగార్జునను ఈ విషయమై స్పందించాలని కోరగా.... మత అసహనంపై మాట్లాడేందుకు నాగార్జున నిరాకరించారు. సున్నితమైన అంశం కావడం, తాను ఏం మాట్లాడినా మళ్లీ అదో పెద్ద ఇష్యూ అయ్యే అవకాశం ఉండటంతో నాగార్జున నిరాకరించినట్లు స్పష్టం అవుతోంది.