అనుష్కకు తీరిన కష్టాలు.. సైలెంట్‌గా అమెరికాకు..

బాహుబలి, భాగమతి విజయాల తర్వాత అనుష్క శెట్టి సినిమాలకు చాలా దూరంగా ఉన్నారు. భాగమతి రిలీజై ఏడాదిన్నర కావోస్తున్నా.. మరో సినిమా పట్టాలెక్కలేదు. తాజాగా సైలెన్స్ అనే చిత్రంలో నటించడానికి అంగీకారం తెలిపింది. అయితే ఈ సినిమాకు సంబంధించిన షూటింగ్ ప్రధాన భాగం అమెరికాలో జరుగుతుంది. అందుకోసం సినిమా యూనిట్ యూఎస్‌కు వెళ్లేందుకు ఏర్పాట్లు చేసుకొన్నారు. కానీ అనుష్కశెట్టికి వీసా సమస్యలు ఎదురు కావడంతో షూటింగ్ షెడ్యూల్‌ను వాయిదా వేశారు. వాస్తవానికి ఫిబ్రవరిలోనే ఈ సినిమా షూటింగ్ ప్రారంభం కావాల్సింది.

ప్రస్తుతం అమెరికా వీసాకు సంబంధించిన నిబంధనలు మరింత కఠినం అయ్యాయి. దాంతో అచితూచీ అధికారులు నిర్ణయం తీసుకొంటున్నారు. ఈ నేపథ్యంలో అనుష్క ఓ1 వీసాను దరఖాస్తు చేసుకొన్నది. సాధారణంగా కళలు, క్రీడలు, శాస్త్రవేత్తలకు సంబంధించిన వ్యక్తులకు ఈ వీసాను జారీ చేస్తారు. తాజాగా ఈ వీసా నిబంధనల్లో మార్పులు వల్ల అనుష్క వీసా ఆలస్యమైందట. ఇప్పుడు అనుష్క వీసాకు ఆమోదం లభించడంతో షూటింగ్‌కు క్లియరెన్స్ లభించింది.

ప్రస్తుతం అనుష్క శెట్టి వీసా సమస్యలు తీరిపోవడం, ఆమెకు ఎంబసీ నుంచి క్లియరెన్స్ రావడంతో మళ్లీ షూటింగ్ ఏర్పాట్లు ఊపుందుకొన్నాయి. ఈ చిత్రం షూటింగ్‌ను మే రెండోవారం ప్రారంభించాలని యూనిట్ నిర్ణయం తీసుకొన్నట్టు సమాచారం. దాంతో అనుష్క త్వరలోనే అమెరికాకు వెళ్లి షూటింగ్‌లో పాల్గొంటారనేది తాజా సమాచారం.

హీరో మాధవన్ నటిస్తున్న ఈ చిత్రానికి కోన వెంకట్ నిర్మాతగా, రచయితగా వ్యవహరిస్తున్నాడు. హేమంత్ మధుకర్ దర్శకత్వం వహిస్తున్నారు. ఈ సినిమా కోసం హాలీవుడ్ నటుడు మైఖేల్ మ్యాడ్‌సన్ తీసుకొన్నారు. మైఖేల్ కిల్ బిల్ లాంటి చిత్రాలతో భారతీయ సినీ ప్రేక్షకులకు సుపరిచితులు. ఇంకా ఈ చిత్రంలో సుబ్బరాజు, షాలిని పాండే, అవసరాల శ్రీనివాస్ తదితరులు నటిస్తున్నారు. పీపుల్స్ మీడియా ఫ్యాక్టరీ బ్యానర్‌పై ఈ సినిమా రూపొందుతున్నది.