‘ఋషి‌’గా మారిన ఇట్స్ మై లవ్ స్టోరీ హీరో

'ఇట్స్ మై లవ్ స్టోరీ' సినిమా ద్వారా ఇటీవల హీరోగా పరిచయం అయిన అరవింద్ త్వరలో 'ఋషి' సినిమా ద్వారా ప్రేక్షకుల ముందుకు రాబోతున్నాడు. ఈ సినిమాకు సంబంధించిన ఫస్ట్ లుక్ పోస్టర్లను బుధవారం విడుదల చేశారు. ఈ చిత్రంలో అరవింద్ మెడికో పాత్రలో నటించబోతున్నాడు. అరవింద్ సరసన సుప్రియా హీరోయిన్ నటిస్తోంది.

దాసరి నారాయణరావు యంగ్ ఇండియా ద్వారా తెలుగు తెరకు పరిచయం అయిన అరవింద్...ఇట్స్ మై లవ్ స్టోరీ సినిమా ద్వారా మంచి పేరును సొంతం చేసుకున్నాడు. ఆ సినిమా ఓ మోస్తరు విజయం సాధించడం, అరవింద్ పర్సనాలిటీ, నటన ఆకట్టుకునే విధంగా ఉండటంతో మరిన్ని అవకాశాలు ఆయన ఖాతాలో వచ్చి చేరుతున్నాయి.

ఎ మెడికో జర్నీ అనే ట్యాగ్ లైన్‌తో ఒక మెడికల్ విద్యార్థి ప్రేమకథను ఈ చిత్రంలో ఆవిష్కరిస్తున్నారు. రాజ్ మాదిరాజు ఈ చిత్రానికి దర్శకత్వం వహిస్తున్నారు. స్నిగ్ధ సంగీతం సమకూర్చుతున్నారు. ఇప్పటికే షూటింగ్, ప్రొడక్షన్ ఫార్మాలిటీస్ పూర్తి చేసుకున్న ఈ చిత్రాన్ని ఫిబ్రవరిలో విడుదల చేసేందుకు సన్నాహాలు చేస్తున్నారు. రమేష్ ప్రొడక్షన్స్ బ్యానర్‌పై రమేష్ ప్రసాద్ ఈ చిత్రాన్ని నిర్మిస్తున్నారు. ప్రసాద్ ప్రొడక్షన్స్ బ్యానర్‌పై మన దేశం, మిలన్, ఖిలోనా, ఎక్ తుజే కె లియా అనే చిత్రాలు రూపొందాయి.