బంగ్లాదేశ్‌కు బాహుబలి సెగ.. చార్టెడ్ ఫ్లయిట్‌లో ఇండియాకు.. సినిమా పిచ్చి అంటే మజాకా..?

ఢాకా నుంచి చార్టెడ్ ఫ్లయిట్‌లో..

ఇదిలా ఉంటే బాహుబలి సెగ ముస్లిం సంప్రదాయ దేశం బంగ్లాదేశ్‌కు తాకింది. ప్రపంచ వ్యాప్తంగా సంచలనం రేపుతున్న సినిమాను చూడటానికి దాదాపు 40 మంది సినీ అభిమానులు భారత్‌కు రావడం విశేషంగా మారింది. 40 మంది కూడిన ప్రత్యేక బృందం చార్టెట్ ఫ్లయిట్‌లో సోమవారం ఢాకా నుంచి కోల్‌కతాకు చేరుకొన్నారు. దక్షిణ కోల్‌కతాలోని మల్టిప్లెక్స్‌లో ఈ సినిమాను చూసి కొత్త అనుభూతికి గురయ్యారు.

రెండేళ్లుగా ఎదురు చూస్తున్నాం..

బాహుబలిని కట్టప్పను ఎందుకు చంపారో అనే విషయాన్ని తెలుసుకోవడానికి గత రెండేళ్లుగా ఎదురుచూస్తున్నాం. నేను బాహుబలి వీర అభిమానిని. సాయంత్రం ఫస్ట్ షో చూడటానికి సోమవారం ఉదయం ఫ్లయిట్ తీసుకొని కోల్‌కతాకు చేరుకొన్నాం అని బంగ్లాదేశ్ చెందిన సినీ అభిమాని ఒకరు వెల్లడించారు.

ఆ ప్రశ్న వెంటాడింది..

బాహుబలి1 సంచలన విజయం సాధించింది. పార్ట్1లో బాహుబలిని ఎందుకు చంపారనే ప్రశ్న మమ్మల్ని వెంటాడుతున్నది. దాంతో బాహుబలి2 చూడాలనే ఆసక్తి పెరిగింది. ఇండియాలోని చాలా మంది స్నేహితులు సినిమా చూశారు. ఆ ప్రశ్నకు సమాధానంచ చెప్తామంటే మేము సినిమా చూస్తాం చెప్పవద్దు అని కోరామని ఫర్జానా బ్రోనియా అన్నారు.

బాహుబలి చూసిన తర్వాత..

ఈ సినిమా చూడటం కోసం హసన్ ఖాన్ అనే పారిశ్రామిక వేత్త తన కుమారుడు, కూతురుతో కలిసి ఢాకా నుంచి కోల్‌కత్తాకు వచ్చారు. బంగ్లాదేశీయులకు బాలీవుడ్ సినిమాలు అంటే చాలా ఇష్టం. సౌత్ ఇండియా సినిమాల గురించి పెద్దగా తెలియదు. సౌత్ ఇండియాలో రూపొందిన సినిమాలు పెద్దగా చూడలేదు. బాహుబలి1 చూసిన తర్వాత నోట మాట పెగల్లేదు. హలీవుడ్ సినిమాలకు స్థాయిగా సినిమా రూపొందింది అని ఓ బంగ్లా అభిమాని చెప్పారు.

ఊహ తెలిసినప్పటి నుంచి..

నాకు ఊహ తెలిసినప్పటి నుంచి ఓ సినిమాకు ఇలాంటి స్పందన వచ్చిన దాఖలాలు లేవు. బెంగాల్ చరిత్రలో ఇంత కలెక్షన్లు వసూలు చేసిన సినిమాను నేనింత వరకు చూడలేదు. ప్రేక్షకులు భారీగా వస్తుండటంతో ఉదయం 7.30 గంటలకే మొదటి ఆటను ప్రారంభిస్తున్నాం అని ఈస్ట్ ఇండియాలోని ఐనాక్స్ డైరెక్టర్ సుభాశీస్ గంగూలీ వెల్లడించారు.