నరసింహుడి సేవలో నరసింహనాయుడు

By Staff

Published: Wednesday, March 11, 2026, 7:02 [IST]

తండ్రి ఎన్టిఆర్ లాగే జీవితంలో క్రమశిక్షణ, దైవభక్తి కి అత్యంత ప్రాధాన్యతనిచ్చే వ్యక్తి బాలకృష్ణ . ఆయన గత రెండు రోజులుగా ఊళ్ళో లేరు. మండుటెండలు సైతం లెక్క చేయకుండా మనసుకు నచ్చిన దైవ సందర్శన కార్యక్రమం పెట్టుకున్నారు. రెండు రోజుల క్రితం (మే 14) కోనసీమలోని పుణ్యక్షేత్రాల్ని సందర్శించారు. అందులో భాగంగా అంతర్వేదిలోని శ్రీలక్ష్మీ నరసింహస్వామి దేవాలయాన్ని సందర్శించారు. అక్కడ స్వామి వారికి ప్రత్యేక పూజలు నిర్వహించారు. అంతేగాక అక్కడ సమీపంలోని వశిష్ట సేవాశ్రమాన్ని దర్శించి అక్కడి విశేషాల్ని అడిగి తెలుసుకున్నారు. త నని కలిసిన వారితో అంతర్వేదికి రావడం తనకిదే ప్రథమమనీ, నరసింహుడే తనని రప్పించుకున్నాడనీ వ్యాఖ్యానించారు.

ఆ తర్వాత ...అంతర్వేదినుంచి పుల్లేటికుర్రు వెళ్లి అక్కడి రామలింగ చౌడేశ్వరీ ఆలయంలో ప్రత్యేక పూజలు జరిపారు. అక్కడినుంచి రాజమండ్రికి వచ్చి తన బంధువు, స్నేహితుడైన అల్లూరి ప్రసాద్ ఇంట్లో రాత్రివరకు గడిపారు. అనంతరం అక్కడి వారి గౌరవ వీడ్కోలు తీసుకుని గౌతమీ ఎక్స్‌ప్రెస్‌లో హైదరాబాద్‌కు వచ్చారు. ఈ కార్యకమంలో పలువురు తెలుగుదేశం నాయకులు, బాలకృష్ణ అభిమానులు పాలు పంచుకున్నారు. అక్కడ కలిసిన మీడియా వారితో తాను కేవలం దైవ కార్యక్రమాల కోసమే వచ్చాననీ, రాజకీయాల గురించి మాట్లాడననీ తెలిపారు. మరో ప్రక్క పౌరాణిక చిత్రం 'పాండురంగడు' రిలీజు సమయంలో ఈ విష్ణు దేవాలయాల సందర్శన ప్రాధాన్యత సంతరించుకుంది.

More from Filmibeat