రజనీకాంత్ కావాలన్న కథతోనే బాలకృష్ణకు...

ఒకానొక సమయంలో ఈ ఔట్‌ లైన్‌ రజనీకాంత్‌ విని తనకు కావాలన్నారు. కానీ తెలుగులో చేయాలని ఉందని చెప్పాను. ఈ చిత్రం బాలయ్య స్థాయిని ఇంకో మెట్టు పైకి తీసుకెళుతుంది. వచ్చే సంక్రాంతికి విడుదల చేయాలని భావిస్తున్నాం అన్నారు ప్రముఖ దర్శకుడు దాసరి నారాయణ రావు. ఆయన తాజాగా..బాలకృష్ణ హీరోగా 'పరమవీరచక్ర' అనే టైటిల్ ని ప్రకటించారు. ఈ చిత్రం గురించి చెబుతూ ఆయన...'నన్నెంతో ప్రోత్సహించిన గొప్ప హీరో ఎన్టీఆర్. ఆయన కుమారుడు బాలకృష్ణతో 'సర్దార్ పాపారాయుడు', 'బొబ్బిలిపులి' చిత్రాల స్థాయిలోఉండే 'పరమవీరచక్ర' చిత్రాన్ని రూపొందించనుండటం, ఇది నా 150వ చిత్రం కావడం ఎంతో సంతోషాన్ని కలిగిస్తోంది. రెండేళ్ల నుంచి ఈ ప్రాజెక్ట్‌కు రూపకల్పన జరుగుతోంది. నేను తయారు చేసుకున్న సబ్జెక్టుకి పరిపూర్ణ న్యాయం చేయగల నటుడు బాలకృష్ణ మాత్రమే. ఈ సబ్జెక్టుని రజనీకాంత్ అడిగినా నేను ఇవ్వలేదు. మా ఇద్దరి కాంబినేషన్ పట్ల ఏర్పడే అంచనాలను అధిగమించేలా 'పరమవీరచక్ర' చిత్రం ఉంటుంది. బాలకృష్ణ ఈ సినిమాలో చరిత్రలో నిలిచే స్థాయి పాత్రని ధరిస్తున్నారు. కష్టపడే తత్వం, సినిమా నిర్మాణంపై సంపూర్ణ అవగాహన ఉన్న నిర్మాత సి.కళ్యాణ్ ఈ చిత్రాన్ని నిర్మిస్తున్నారు. ఆయనకి అభినందనలు' అన్నారు. ఇంకా ఈ సమావేశంలో చిత్ర సహ నిర్మాత సి.వి.రావు కూడా పాల్గొన్నారు. తేజ సినిమా పతాకంపై సి.కల్యాణ్‌ నిర్మిస్తున్నారు. ఎస్‌.రమేష్ ‌బాబు సమర్పకుడు. జూన్‌ 10 నుంచి షూటింగ్‌ ప్రారంభమవుతుంది.