బాలయ్య కొత్త పేరు, ఇకపై అలానే పిలవాలన్న నటసింహం!

హైదరాబాద్: నందమూరి బాలకృష్ణ తన కొత్త పేరును ప్రకటించారు. తనను బాలకృష్ణ అని కాకుండా.... 'బసవ తారకరామ పుత్ర బాలకృష్ణ' అని పిలవాలని ఆయన సూచించారు. ఆయన నటించిన చారిత్రక చిత్రం 'గౌతమీపుత్ర శాతకర్ణి' సినిమా విడుదల నేపథ్యంలో ఆయన ఈ ప్రకటన చేయడం విశేషం.

జాగర్లమూడి క్రిష్ దర్శకత్వంలో తెరకెక్కిన 'గౌతమీపుత్ర శాతకర్ణి' చిత్రం జనవరి 12న సంక్రాంతి పండగ సందర్భంగా విడుదలవుతోంది. తెలుగు జాతి చరిత్రను చాటి చెప్పే సినిమా కావడంతో ఈ సినిమా పన్ను మినహాయింపు కోసం బాలయ్య రెండు తెలుగు రాష్ట్రాల ముఖ్య మంత్రులను కలుస్తున్నారు.

శాతవాహన మహారాజు "శాతకర్ణి" జీవితం ఆధారంగా క్రిష్ తెరకెక్కించిన హిస్టారికల్ మూవీగా తెరకెక్కిన ఈ చిత్రాన్ని ఫస్ట్ ఫ్రేమ్ ఎంటర్ టైన్మెంట్స్ పతాకంపై బిబో శ్రీనివాస్ సమర్పణలో వై.రాజీవ్ రెడ్డి-జాగర్లమూడి సాయిబాబు నిర్మించారు.

బాలకృష్ణ సరసన శ్రేయ "వశిష్ట మహాదేవి"గా ముఖ్యభూమిక పోషించిన ఈ చిత్రంలో బాలీవుడ్ నటీమణి హేమమాలిని శాతకర్ణుడి వీరమాత "గౌతమి"గా ప్రత్యేక పాత్ర పోషించడం విశేషం. జనవరి 5న "గౌతమీపుత్ర శాతకర్ణి" చిత్రాన్ని వీక్షించిన సెన్సార్ సభ్యులు సింగిల్ కట్ కూడా లేకుండా "యు/ఎ" సెర్టిఫికేట్ ఇచ్చారు.

శాలివాహన శకం నేపధ్యంలో తెరకెక్కిన ఈ చిత్రాన్ని క్రిష్ ఓ దృశ్యకావ్యంలా తెరకెక్కించారని, సినిమా చూస్తున్నంతసేపు గౌతమిపుత్ర శాతకర్ణుడిగా నందమూరి నటసింహం బాలకృష్ణ నటన అద్భుతంగా ఉందని సెన్సార్ సభ్యులు క్రిష్ అండ్ టీమ్ కు శుభాకాంక్షలు తెలిపారు.