ఫోటోలు: భాగ్ మిల్ఖా భాగ్-భార్యతో ప్రకాష్ రాజ్ ఇలా

‘ఫ్లయింగ్ సిక్కు'గా ప్రపంచానికి సుపరిచితుడైన ఇండియన్ స్టార్ అథ్లెట్ మిల్కాసింగ్ జీవిత కథను ఆధారంగా చేసుకుని ‘భాగ్ మిల్ఖా భాగ్' చిత్రం తెరకెక్కింది. ఫర్హాన్ అక్తర్ మిల్ఖా సింగ్ పాత్రను పోషించారు. ఢిల్లీ-6 దర్శకుడు రాకేష్ ఓం ప్రకాస్ మెహ్రా ఈచిత్రానికి దర్శకత్వం వహించారు.

దేశ విభజన సమయంలో పాకిస్థాన్‌లో మిల్ఖా సింగ్ అనే బాలుడి కుటుంబ ఊచకోతకు గురవుతుంది. బ్రతికి బయట పడ్డ మిల్ఖా సింగ్ ఢిల్లీ చేరుకుంటాడు. దుర్భర పరిస్థితులు, నేరాలు చేస్తూ పెరిగిన ఆ బాలుడు ఆ తర్వాత సైన్యంలో చేరి జవాన్‌గా ఎలా మారాడు, దేశం గర్వించదగ్గ అథ్లెట్‌గా మారడానికి దారి తీసిన సంఘటనలను సినిమాలో చూపించారు.

ఓ అథ్లెట్ జీవితంలో చోటు చేసుకున్న ఒడిదుడుకులకు తోడుగా డ్రామా, ఎమోషన్, హ్యూమర్, విషాదం అనే అంశాలతో పాటు సృజనాత్మకతను జోడించడంలో రచయిత ప్రసూన్ జోషి సక్సెస్ అయ్యారు. ఆయన అందించిన స్క్రీన్ ప్లే, మాటలు భాగ్ మిల్ఖా భాగ్ చిత్రం విజయానికి కారణం అయింది.

మిల్ఖా సింగ్ పాత్రను పోషించిన ఫర్హాన్ అక్తర్....పాత్రలో ఒదిగిపోయాడు. ఓ అథ్లెట్ పాత్రలో నటించడానికి తన దేహాన్ని పూర్తిగా మార్చుకోవడానికి ఫర్హాన్ అక్తర్ పడిన కష్టం, తాపత్రయం, కృషి అద్భుతం. ఒకరకంగా ఆ పాత్రలో ఫర్హాన్ అక్తర్ పరకాయ ప్రవేశం చేసాడని చెప్పొచ్చు.

దర్శకుడు రాకేష్ ఓంప్రకాష్ మెహ్రా చిత్రాన్ని ఎంతో అద్భుతంగా తెరకెక్కించాడు. ఫర్హాన్ అక్తర్ అందించిన అత్యుత్తమ నటనను పూర్తిగా వినియోగించుకోవడంతో పాటు....సినిమా చూస్తున్న ప్రేక్షకులు సైతం సినిమాలో లీనం అయిపోయేలా చేయడంలో సక్సెస్ అయ్యాడు.

ఈ చిత్రంలో హీరోయిన్‌గా నటించిన సోనమ్ కపూర్ కనిపించేది పావుగంటే అయినా సినిమాకు ఎంతో కీలకంగా మారింది. స్క్రీన్‌పై ఉన్నంత సేపు సోనమ్ కపూర్ ఎంతగానో ఆకట్టుకుంది. ఒక రకంగా చెప్పాలంటే మిల్ఖాసింగ్ జీవితం మలుపు తిరగడానికి ఆమె పాత్రే కీలకం.

ఈచిత్రంలో మిల్ఖా సింగ్ సోదరి పాత్రను బాలీవుడ్ నటి దివ్యా దత్తా పోషించింది. సినిమాలో ఎంతో కీలకమైన పాత్ర ఇది. సినిమాలో వీరిద్దరి మధ్య కొన్ని సన్నివేశాలు భావోద్వేగాన్ని కలిగిస్తాయి.