హాలీవుడ్ చిత్రంలో అమితాబ్ బచ్చన్..!?

ఇన్నాళ్ళూ హీరోయిన్స్ కే హాలీవుడ్ ఆఫర్స్ వస్తున్నాయని నిరాశలో ఉన్న బాలీవుడ్ హీరోలకు ఇప్పుడు ఊపిరి పీల్చుకునే అవకాశం వచ్చింది. బాలీవుడ్ మెగాస్టార్ అమితాబ్ బచ్చన్ హాలీవుడ్‌లో రంగ ప్రవేశం చేయనున్నారు. ఒక పారిస్ నటుడు తన బ్లాగులో రాసుకున్న కథను అమితాబ్‌పై చిత్రించనున్నారని బాలీవుడ్ వర్గాల్లో వార్తలు గుప్పుమంటున్నాయి. అంతేకాదు... అమితాబ్ తాను నటింబోతున్న మొట్ట మొదటి అంతర్జాతీయ సినిమాకు సంబంధించిన ఒప్పందపు పత్రాలపై ఇప్పటికే సంతకాలు కూడా చేసేశారని కూడా వారు చెప్పుకుంటున్నారు.

2006లో "మార్చ్ ఆఫ్ పెంగ్విన్" చిత్రానికి ఆస్కార్ అవార్డును గ్రహించిన లుక్ జాక్వెట్... అమితాబ్ హాలీవుడ్ సినిమాకు నిర్మాణ సారథ్యం వహిస్తున్నారని సమాచరం. ఇక అమితాబ్ హాలీవుడ్ సినిమా షూటింగ్ 2009లో ప్రారంభం కానుందని, ఇండియా, ఫ్రాన్స్‌లలో ఈ చిత్ర షూటింగ్ జరుగుతుందని వినికిడి. అయితే అధికారికంగా ఏ ప్రకటనా వెలబడలేదు. దీనిని ధ్రువీకరిస్తూ... అమితాబ్ కూడా హాలీవుడ్‌లో నటించేందుకు సిద్ధమేనని వెల్లడించినట్లు విశ్వసనీయ వర్గాల ద్వారా తెలిసింది.