ఈ స్టార్స్ కండోమ్ యాడ్స్ చేయాల్సిన అవసరం ఉంది

By Bojja Kumar

Updated: Tuesday, February 24, 2015, 13:07 [IST]

హైదరాబాద్: సినిమాల్లో బాగా పేరు వచ్చిన స్టార్స్ వెంట పలు కార్పొరేట్ సంస్థలు పడటం మామూలే. కోట్లు ఆఫర్ చేస్తుండటంతో ఓ వైపు సినిమాలు చేస్తూనే మరో వైపు సదరు వ్యాపార ప్రకటనల్లో నటిస్తున్నారు స్టార్ హీరోలు, హీరోయిన్లు. అయితే కండోమ్ యాడ్స్ విషయం వచ్చే సరికి మాత్రం చాలా మంది స్టార్స్ ముందుకు రావడం లేదు. పెద్దగా పేరు లేని క్రింది స్థాయి నటులు మాత్రమే ఇలాంటి యాడ్స్‌కు దిక్కవుతున్నారు. అయితే ఇటీవలే బాలీవుడ్లో మెయిన్ స్ట్రీమ్ యాక్టర్, యంగ్ స్టార్ హీరోల్లో ఒకరైన రణవీర్ సింగ్ ‘డూరెక్స్' కండోమ్ యాడ్లో నటించి సరికొత్త ట్రెండుకు నాంది పలికాడు. నటి సన్నీ లియోన్ కూడా ‘మ్యాన్ ఫోర్స్' కండోమ్ యాడ్లో నటించింది.

కండోమ్ యాడ్స్ అంటేనే....శృంగార భరితంగా ఉంటాయి. అయితే వాటిని వాడకం పెంచడానికి హాట్ హాట్‌గా వాటిని చిత్రీకరించడం తప్పేమీ కాదనేది సదరు కంపెనీల వాదన. అయితే కండోమ్ వాడకం ఎంత పెరిగితే అంత మంచి జరుగుతుంది సమాజానికి అంటున్నారు. హెచ్.ఐ.వి ఎయిడ్స్, ఇతర సుఖ వ్యాధులు వ్యాపించకుండా ఉండటానికి కండోమ్ వాడకం తప్పని సరి. అవాంచిత గర్భం రాకుండా ఉండేందుకు కండోమ్‌ను మించిన సురక్షిత మార్గం మరొకటి లేదు.

అయితే కండోమ్ వాడకం పెంచడానికి స్టార్ హీరోలు రంగంలోకి దిగితే ఫలితాలు మరింత బావుంటాయని అంటున్నారు విశ్లేషకులు. దురదృష్ట వశాత్తు మన దేశంలోని స్టార్స్ ఇలాంటివి చేయడానికి ముందుకు రావడం లేదు. ఎందుకంటే మన దేశంలో ‘సెక్స్' అనే అంశం ఒక నిశిద్ధ అంశంగానే సాధారణ ప్రజల్లో పరిగణించబడుతోంది. ఎవరూ ‘సెక్స్' గురించి బహిరంగంగా మాట్లాడానికి ఇష్టపడని పరిస్థితులు ఇప్పటికీ నెలకొని ఉన్నాయి. తమ ఇమేజ్ దెబ్బతింటుందనే ఉద్దేశ్యంతో కండోమ్ యాడ్స్ చేయడానికి స్టార్ హీరోలు ఇష్ట పడక పోవడానికి ఇది కూడా ఒక కారణం అయి ఉండొచ్చు.

‘సెక్స్' పరమైన అంశాల్లో నిశ్శబ్ధాన్ని చేధించాల్సిన అవసరం ఎంతైనా ఉందని, కండోమ్స్ వాడకం, సురక్షితమైన శృంగారం గురించి ప్రజల్లో అవగాహన పెరిగినపుడే హెచ్ఐవి ఎయిడ్స్, సుఖ వ్యాధులు లాంటిని అరికట్టడానికి వీలవుతుందనేది నిపుణుల అభిప్రాయం. మనదేశంలో ఎయిడ్స్, సుఖవ్యాధులు వ్యాపించడానికి కండోమ్ వాడకం సరిగా లేక పోవడమే అని పలు అధ్యయనాల్లో తేలింది.

ఆ మధ్య రణవీర్ కపూర్ లాంటి స్టార్ హీరో కండోమ్ యాడ్లో నటించగానే...మీడియా ఫోకస్ అంతా అతని వైపు మళ్లింది. అయితే అతను ఏ మాత్రం బెరవకుండా...కండోమ్ వాడకం పెంచడం అంటే మంచి పని చేయడమే, హెచ్ఐవి ఎయిడ్స్, ఇతర సుఖ వ్యాధులు నిరోధించడంలో కండోమ్స్ కీలకం అని ధైర్యంగా చెప్పాడు. రణవీర్ సింగ్ దారిలోనే ఇతర స్టార్స్ నడవాల్సిన అసవరం ఉందనే వాదన వినిపిస్తోంది.