హోమ్

న్యూస్

హైదరాబాద్ : పవర్ స్టార్ పవన్ కళ్యాణ్, టాలీవుడ్ నవ్వుల డాన్ బ్రహ్మానందం కాంబినేషన్ అంటే నవ్వుల పూవులు పూయాల్సిందే. వీరి కాంబినేషన్‌కు త్రివిక్రమ్ లాంటి వారు అందించే పంచ్ డైలాగులు తోడైతే థియేటర్లో నవ్వుల జడివాన కురవాల్సిందే. ఆ నవ్వుల వాన ఏ రేంజిలో ఉంటుందే జల్సా సినిమా చూసిన వారికి తెలుసు.

ఈ కాంబినేషన్ మళ్లీ రిపీట్ కాబోతోంది. ప్రస్తుతం పవన్ కళ్యాణ్-త్రివిక్రమ్ శ్రీనివాస్ కాంబినేషన్లో రూపొందుతున్న సరదా(తాత్కాలిక టైటిల్) చిత్రం బ్రహ్మానందం పాత్ర ఏమిటో బయటకు లీకైంది. ఈచిత్రంతో బ్రహ్మానందం రియల్ ఎస్టేట్ దాదాగా కనిపించబోతున్నారని తెలుస్తోంది. త్వరలో పూర్తి వివరాలు బయటకు రానున్నాయి.

ఇటీవలే ఫస్ట్ షెడ్యూల్ పూర్తి చేసుకున్న ఈచిత్రం మార్చి 1 నుంచి సెకండ్ షెడ్యూల్ జరుపుకుంటోంది. ప్రస్తుతం హైదరాబాద్ పరిసర ప్రాంతాల్లో షూటింగ్ జరుగుతోంది. ఈ చిత్రంలో పవన్ కళ్యాణ్ సరసన సమంత, ప్రణీత హీరోయిన్లుగా చేస్తున్నారు. 'మిర్చి' చిత్రంలో ప్రభాస్ తల్లి పాత్రలో నటించిన నదియా ఈ సినిమాలో సమంత తల్లి పాత్రలో నటించబోతోంది. అదే విధంగా బాలీవుడ్ నటుడు బోమన్ ఇరానీ కూడా ఈ చిత్రంలో గెస్ట్ రోల్ చేస్తున్నారు. బివిఎస్ఎన్ ప్రసాద్ ఈచిత్రాన్ని నిర్మిస్తున్నారు. దేవిశ్రీ ప్రసాద్ సంగీతం అందిస్తున్నారు.

పవన్ కళ్యాణ్-త్రివిక్రమ్ శ్రీనివాస్ కాంబినేషన్లో వచ్చిన 'జల్సా' మూవీ మంచి కామెడీ పండించిన సంగతి తెలిసిందే. తాజాగా ఈ ఇద్దరి కాంబినేషన్లో రూపొందుతున్న చిత్రం కామెడీ ప్రధానంగా పంచ్ డైలాగులతో పూర్తి స్తాయి కమర్షియల్ వినోదాత్మక చిత్రంగా రూపొందుతోందని ఫిల్మ్ నగర్ టాక్. 'జల్సా' చిత్రానికి ఈ చిత్రం డబల్ డోస్‌లా ఉంటుందట. ముఖ్యంగా పవన్ కళ్యాణ్ మేనరిజం, త్రివిక్రమ్ పంచ్ డైలాగులు సినిమాకు హైలెట్ కానున్నాయి.