ఇండస్ట్రీలో ఎలాంటి సపోర్టు లేకుంటే...ఆ బాధ ఎలా ఉంటుందో తెలుసు: పవన్ కళ్యాణ్

ఎలాంటి సపోర్టు లేకుంటే బాధ ఎలా ఉంటుందో తెలుసు

‘ఎలాంటి సపోర్టు లేకుండా ఫిల్మ్ ఇండస్ట్రీకి వస్తే ఆ బాధ ఎలా ఉంటుందో తెలుసు. అలాగే ఒక సినిమా జయం రావడం, అపజయం రావడం ఇదంతా జరిగినపుడు ఆ భావన, భాధ ఎలా ఉంటుందో కూడా నాకు తెలుసు... అని పవన్ కళ్యాణ్ వ్యాఖ్యానించారు.

అందుకే నితిన్ సినిమాలకు వస్తున్నా

నేను వరుస అపజయాల్లో ఉన్నపుడు నితిన్ వాళ్ల నాన్నగారు నా దగ్గరికి వచ్చి మా ‘ఇష్క్' సినిమా ఆడియో రిలీజ్ చేయాలని అడిగినపుడు నాకు ఒకటి అనిపించింది. ఇది మంచి సెంటిమెంట్ అని నా దగ్గరికి వస్తున్నారు, నేను విజయంలో ఉంటే వేరే సంగతి ... కానీ వారు నా మీద అభిమానంతో మనస్ఫూర్తిగా వచ్చారని అర్థమైంది. ఏ విషయంలో అయినా మనం ఒక ఎమోషనల్ సపోర్టు కోరుకుంటాం... నితిన్‌కు నేను వెళితే బావుంటుంది అనిపించి వెళ్లాను. మీ అందరి సపోర్టు వల్ల ఇష్క్ సినిమా విజయం సాధించింది.... అని పవన్ కళ్యాణ్ తెలిపారు.

నితిన్‌కు నాకు ఐదారేళ్ల తేడానే

కొంద‌రు నా సినిమాలో చూసి ఐఐటీకి వెళ్లిన విద్యార్థులు కూడా ఉన్నారు. జ‌యాల‌కు పొంగ‌కుండా, అప‌జ‌యాల‌కు కుంగ‌కుండా నిల‌క‌డ‌గా ఉంటూ 16 సంవత్సరాల్లో నితిన్ 20 సినిమాలు చేశారు, ఇది గొప్ప విష‌యం. నాకూ, నితిన్‌కీ వ‌య‌సు పెద్ద తేడా ఉన్న‌ప్ప‌టికీ, సినిమాల అనుభవం ప‌రంగా ఐదారేళ్ల తేడానే.... అని పవన్ కళ్యాణ్ వ్యాఖ్యానించారు.

నితిన్ వాళ్ల నాన్న‌గారు నాకు ఇష్ట‌మైన వ్య‌క్తి

నితిన్ వాళ్ల నాన్న‌గారు నాకు ఇష్ట‌మైన వ్య‌క్తి. కృష్ణ చైతన్యగారు బలమైన స్క్రిప్టు తయారు చేశారు. త‌మ‌న్ సంగీత ద‌ర్శ‌కుడు కాక‌ముందు నుంచీ `ఖుషీ`స‌మ‌యం నుంచీ తెలుసు. మ‌ణిశ‌ర్మ‌గారిని `నాకు ఓ హిందీ పాట కావాలి. థియేట‌ర్‌లో గెంతులు వేయాలి` అని అడిగా. ఆయ‌న బాధ్య‌త‌ను త‌మ‌న్ మీద పెట్టారు. అలాంటి మంచి పాట ఈ రోజుకూ గుర్తుండటానికి కారణం తమన్. అలాంటి తమన్ సంగీత సారథ్యంలో సినిమా వస్తున్నందుకు ఆనందంగా ఉంది... అని పవన్ కళ్యాణ్ అన్నారు.

ఈ సినిమాకు నేను నిర్మాతను అయినప్పటికీ

ఈ సినిమా నిర్మాత‌ల్లో నేను ఒక‌డిని అయిన‌ప్ప‌టికీ దీనికి పని చేసిన చాలా మంది నాకు తెలియ‌దు. అందరికీ పేరుపేరునా ధ‌న్య‌వాదాలు. ఈ సినిమా మీ అందరికి ఆనందాన్ని కలిగిస్తుందని మ‌న‌స్ఫూర్తి తెలియజేసుకుంటూ, నితిన్ మరిన్ని విజయాలు పొందాలని, కృష్ణ‌చైత‌న్య‌గారు మరిన్ని హిట్ సినిమాలు చేయాలని, సుధాకర్ రెడ్డిగారు మరిన్ని గొప్ప విజయాలు అందుకోవాలని మనస్ఫూర్తిగా కోరుకుంటున్నాను... అని పవన్ కళ్యాణ్ తన ప్రసంగం ముగించారు.