అమ్మాయిలు పక్కలోకి పనికొస్తారు.. చలపతిరావు షాకింగ్ కామెంట్.. సూపర్ జవాబు.. యాంకర్ రవి సమర్ధన

చలపతిరావు వెకిలి ప్రశ్న

అక్కినేని నాగచైతన్, రకుల్ ప్రీత్ సింగ్ నటించిన రారండోయ్ వేడుక చూద్దాం సినిమా ఆడియో ఫంక్షన్ ఆదివారం సాయంత్రం హైదరాబాద్‌లో జరిగింది. ఈ కార్యక్రమంలో యాంకర్ అడిగిన ఓ ప్రశ్నకు అతిగా స్పందించిన చలపతిరావు ఇబ్బందుల్లో పడ్డాడు. వైవిధ్యమైన పాత్రలతో విలక్షణమైన నటనతో ఆకట్టుకొన్న చలపతిరావు వెకిలి మాటలపై ప్రస్తుతం దుమారం రేగుతున్నది.

మనఃశాంతికి హానికరం కాదు..

ఆడియో ఆవిష్కరణ కార్యక్రమంలో యాంకర్ మాట్లాడుతూ.. మనందరి మనసుల్లో సుస్థిర స్థానం సంపాదించుకొన్న చలపతిరావు ఇక్కడ ఉన్నారు. అమ్మాయిలు మనఃశాంతికి హానీకరమా అని అడిగిన ప్రశ్నకు సమాధానమిస్తూ.. అమ్మాయిలు మనఃశాంతికి హానికరం కాదు గానీ.. పక్కలోకి పనికి వస్తారు అని కామెంట్ చేశారు. దాంతో అక్కడ ఉన్న వారందరూ అమ్మాయిలను చూస్తూ పడిపడి నవ్వారు. అలాంటి సమాధానాన్ని ఊహించిన యాంకర్ అవాక్కయ్యారు.

సూపర్ అన్సర్ అంటూ యాంకర్ రవి..

నటుడు చలపతిరావు చేసిన ఇలాంటి వ్యాఖ్యలపై ఖండించాల్సి పోయి.. యాంకర్ రవి మాత్రం సూపర్ సమాధానం ఇచ్చారు అంటూ ఆయనను సమర్ధించడంపై నెటిజన్లు ఆగ్రహం వ్యక్తం చేస్తున్నారు. రవి హోస్ట్‌గా నిర్వహించే పటాస్ కార్యక్రమమైతే ఇంకా చెప్పనక్కర్లేదు. ఆ టీవి కార్యక్రమం అంతా బూతు తప్పా మరోకటి కనిపించదు. ఇటీవల నర్సులను ఉద్దేశించి ఆ కార్యక్రమంలో చేసిన వ్యాఖ్యలపై కేసు కూడా నమోదైంది.

ప్రముఖులకు అలవాటే..

చలపతిరావు ఎన్నో దశాబ్దాలుగా సినీ పరిశ్రమలో ఉన్నారు. పెద్దతనంతో హుందాగా వ్యవహరిస్తారు. అలాంటి వ్యక్తి నుంచి ఈ రకమైన కామెంట్లు రావడంపై పలువురు ఆశ్చర్యం వ్యక్తం చేస్తున్నారు. ఇటీవల సీనియర్ నటుడైన ఆలీ కూడా పలువురు యాంకర్లపై అభ్యంతరకరమైన వ్యాఖ్యలు చేసిన సంగతి తెలిసిందే.