చిరు అభిమానుల వీరంగం

ప్రజారాజ్యం పార్టీ ఇటీవల ప్రకటించిన కమిటీల్లో తమకు ప్రాధాన్యత లభించలేదని ఆగ్రహం వ్యక్తం చేస్తూ చిరంజీవి అభిమానులు కరీంనగర్‌ జిల్లా పెద్దపల్లిలో గురువారం వీరంగం సృష్టించారు. పార్టీ కార్యాలయానికి తాళం వేశారు. కార్యాలయంలో ఉన్న పోస్టర్లు, బ్యాన ర్లు, సభ్యత్వం పుస్తకాలను కుప్పగా పోసి దహనం చేశారు. మరో ప్రక్క ఆ పార్టీ అధినేత చిరంజీవి అసంతృప్తికి గురైన వారు మనసులో పెట్టుకోకుండా పార్టీ కోసం పని చేయాలని పిలుపునిచ్చారు. పదవులు ఇంకా చాలా ఉన్నాయని వ్యాఖ్యానించారు. తాజాగా రాజకీయాల్లోకి వచ్చిన వారితోపాటు సీనియర్లకు ప్రాధాన్యమిచ్చామని తెలిపారు.సామాజిక న్యాయం గురించి ప్రస్తావిస్తూ ప్రతి జిల్లా కమిటీలోనూ ఏయే వర్గాలకు ఎంతశాతం పదవులిచ్చిందీ పేర్కొన్నారు.

మండల, గ్రామ, పోలింగు కేంద్రాలకు కమిటీల్ని నియమించేటప్పుడూ సామాజిక న్యాయానికి అగ్రప్రాధాన్యమివ్వాలని సూచించారు. నూతనంగా ఏర్పాటు చేసిన కమిటీల్లోకి తీసుకున్న వారంతా సామర్థ్యమున్న వారేనని, అందరూ వారి శక్తి మేరకు పనిచేయాలని కోరారు. అభిమానులందర్నీ పార్టీలో భాగంగా పరిగణించాలని సూచించారు. ఇటీవల నియమించిన తొమ్మిది జిల్లాల పార్టీ అడ్‌హాక్‌ కమిటీ సభ్యుల సమావేశంలో గురువారం చిరంజీవి పాల్గొని ప్రసంగించారు. ప్రజల్లోని అభిమానాన్ని ఓట్లరూపంలో మార్చటానికి అందరూ కృషి చేయాలని కోరారు. అలాగే రాబోయే రోజుల్లో రాష్ట్రంలో ఎక్కడా చూసినా ప్రజారాజ్యమే కనిపించాలని పిలుపునిచ్చారు.