Mega Blockbuster దీపిక, రష్మికతో రోహిత్ శర్మ.. ఏం జరగబోతుంది? ఫ్యాన్స్​లో ఉత్కంఠ..!

గతంలో జరిగినా.. తేడా ఏంటంటే..

అయితే సినిమా, క్రికెట్ కలవడం గతంలోనూ జరిగింది. సీసీఎల్ లాంటి ఈవెంట్​లలో ఒకప్పుడు చిరంజీవి, బాలకృష్ణ, నాగార్జున, వెంకటేశ్ వంటి అగ్రకథానాయకులతో పాటు ఇతర హీరోలు కూడా అభిమానులకు వినోదాన్ని పంచారు. ఇక ఐపీఎల్ వంటి క్రికెట్ ఈవెంట్ల ప్రారంభోత్సవాలు, ముగింపు వేడుకల్లోనూ సినీతారలు సందడి చేస్తూ.. ఉత్సాహాన్నిస్తారు. అయితే ఆ వేడుకల్లో సినీతారలు, క్రికెటర్లు కలిసి పాల్గొన్నది లేదు. దీంతో మెగా బ్లాక్​బస్టర్​ వినూత్న ప్రాజెక్టు అని చెప్పొచ్చు.

అటు దీపిక, రష్మిక.. ఇటు రోహిత్, దాదా..

ఏదైనా ఈవెంట్​లో కానీ సినిమాలో కానీ ఒకరికి మించి ఎక్కువ మంది సెలబ్రిటీలను చూస్తే అభిమానులకు కన్నులపండుగే. వాటికోసం ఆసక్తిగా ఎదురుచూస్తుంటారు. ఇక అందులో క్రికెటర్లు సైతం పాల్గొంటే.. ఆ అనుభూతిని మాటల్లో చెప్పలేం. అలాంటి ప్రాజెక్టే ఇప్పుడు ప్రేక్షకుల ముందుకు రానుంది. దానికోసం బాలీవుడ్ టాప్ హీరోయిన్ దీపికా పదుకొణె నుంచి దక్షిణాది తారలు త్రిష, కార్తీ, రష్మిక వరకు జట్టుకట్టనున్నారు. ఇక టీమ్​ఇండియా కెప్టెన్ రోహిత్ శర్మతో పాటు బీసీసీఐ అధ్యక్షుడు సౌరవ్ గంగూలీ కూడా ఇందులో పాలుపంచుకోనున్నారు.

సర్​ప్రైజ్​ అంటున్న దీపిక..

ఈ విషయాన్నే వెల్లడిస్తూ శుక్రవారం ఇన్​స్టాగ్రామ్​లో ఓ పోస్ట్​ చేసింది దీపిక. సర్​ప్రైజ్​ అంటూ అభిమానులను ఊరిస్తోంది. మెగా బ్లాక్​బస్టర్​.. ట్రైలర్​ సెప్టెంబర్​ 4న విడుదల కానుందని తెలిపింది. రష్మిక కూడా గురువారమే ఈ ప్రాజెక్టు గురించి వెల్లడించింది. ఇందులో చాలా ఫన్​ ఉందంటూ క్యాప్షన్ ఇచ్చింది. దానికోసం ఎంతో ఆసక్తిగా ఎదురుచూస్తున్నట్లు చెప్పింది.

కపిల్​ శర్మ ఉండగా.. హాస్యానికి ఢోకా ఉండదుగా..

ఇక హిందీలో పాపులర్ కమెడియన్ కపిల్ శర్మ, త్రిష, కార్తీ కూడా ఈ ప్రాజెక్టులో పాల్గొంటున్నారు. అందుకు సంబంధించిన పోస్టర్లను తమ సామాజిక మాధ్యమాల్లో పోస్ట్​ చేసి ఫ్యాన్స్​లో క్యూరియాసిటీ పెంచుతున్నారు. ఈ విజువల్ ట్రీట్​ కోసం అందరూ సెప్టెంబర్​ 4 కోసం వేచిచూడాలని వారు పేర్కొన్నారు.

అరంగేట్రం అంటున్న హిట్​మ్యాన్​..

ఈ ప్రాజెక్టు గురించి ప్రకటిస్తూ షూటింగ్​లో పాల్గొనడం ఎంతో సంతోనిచ్చిందని అన్నారు గంగూలీ. త్వరలోనే ఇది ప్రేక్షకుల ముందుకు రానుందని తెలిపారు. ఇక రోహిత్ శర్మ సైతం.. మెగా బ్లాక్​బస్టర్​పై చేసిన పోస్ట్ వైరల్​గా మారింది. హిట్​మ్యాన్ సినిమాల్లో నటిస్తున్నాడా.. అనే ఊహాగానాలకు స్వయంగా అతనే తెరలేపాడు. అందుకు తగ్గట్టుగానే "ఇది అరంగేట్రం లాంటిది" అని ఆ ఫొటో కింద రాసుకొచ్చాడు టీమ్​ఇండియా కెప్టెన్. దీనికోసం ఎంతో ఆసక్తిగా ఉన్నట్లు చెప్పాడు. అన్నట్టు ఫొటోలో సాధారణ మధ్యతరగతి వ్యక్తిలా హాఫ్​ స్లీవ్స్​ షర్ట్​లో ప్రేక్షకులకు కొత్త అనుభూతిని పంచేందుకు రోహిత్ సిద్ధమవుతున్నట్లు ఉంది.
ఇంతమంది స్టార్స్​ని ఒకే వేదికపై చూడటం కచ్చితంగా ఫ్యాన్స్​కు అదిరిపోయే ట్రీట్ అని చెప్పొచ్చు. అయితే ఈ మెగా బ్లాక్​బస్టర్​ అనేది ఏదైనా షోనా? సిరీస్ లేదా వీడియోనా? అనేది తెలియాల్సి ఉంది. ఈ ప్రశ్నలకు సమాధానాలు తెలియాలంటే ఆదివారం వరకు వేచిచూడాల్సిందే.