గబ్బర్ సింగ్ -2, దేవిశ్రీకి మరో బంపర్ ఆఫర్

By Bojja Kumar

| Published: Saturday, June 22, 2013, 9:50 [IST]

హైదరాబాద్ : యువ సంగీత దర్శకుడు దేవిశ్రీ ప్రసాద్‌కు మరోసారి బంపర్ ఆఫర్ చేజిక్కించుకున్నాడు. పవర్ స్టార్ పవన్ కళ్యాణ్ హీరోగా రూపొందబోయే 'గబ్బర్ సింగ్-2' చిత్రానికి సంగీతం అందించే చాన్స్ దక్కించుకున్నాడు. పవన్ కళ్యాణ్‌తో తొలిసారిగా 'జల్సా' సినిమాకు పని చేసిన దేవిశ్రీ ఆ సినిమాకు మాంచి మాస్ బీట్లు ఇచ్చి అందరినీ మెప్పించాడు.

జల్సా ఆడియో మంచి హిట్ కావడంతో 'గబ్బర్ సింగ్' చిత్రానికి దరువేసే చాన్స్ కొట్టేసి.....తనకు ఇచ్చిన అవకాశాన్ని మరోసారి సద్వినియోగం చేసుకున్నాడు. ఆ తర్వాత 'అత్తారింటికి దారేది' చిత్రానికి సంగీతం అవకాశం దక్కించుకుని హాట్రిక్ కొట్టాడు. ఇంకా ఈ సినిమా ఆడియో విడుదల కాకముందే 'గబ్బర్ సింగ్-2' చిత్రానికి కూడా ఎంపికవడం విశేషం. పవన్ అభిమానులు మెచ్చే విధంగా ట్యూన్స్ ఇస్తాడనే నమ్మకంతోనే....మరోసారి దేవిశ్రీకి అవకాశం దక్కినట్లు స్పష్టం అవుతోంది.

గబ్బర్ సింగ్-2 చిత్రానికి సంపత్ నంది దర్శకత్వం వహిస్తున్నారు. 'గబ్బర్ సింగ్-2' చిత్రం సరికొత్త కథతో చేస్తున్నామని చెప్పిన సంపత్......ఈ సినిమా గబ్బర్ సింగ్ చిత్రానికి ప్రీక్వెల్ గానీ, సీక్వెల్ గానీ కాదని స్పష్టం చేసాడు. జేమ్స్ బాండ్ సిరీస్ సినిమాలు దేనికది ఎలా ప్రత్యేకమో, గబ్బర్ సింగ్-2 చిత్రం కూడా ప్రత్యేకమైన కథతో తెరకెక్కిస్తున్నట్లు తెలిపారు.

మరో ఆసక్తికర విషయం ఏమిటంటే..... సంపత్ నంది మదిలో 'బెంగాల్ టైగర్' అనే టైటిల్ ఆలోచన ఉందట. అవకాశం వస్తే 'గబ్బర్ సింగ్-2' టైటిల్ 'బెంగాల్ టైగర్'గా మారుస్తానని అంటున్నాడు. అయితే ఈ విషయాన్ని తాను ఇప్పుడే ఖరారు చేయలేనని స్పష్టం చేస్తున్నాడు సంపత్. 'ఖుషి' చిత్రంలో పవన్ చెప్పిన 'ఐయామ్ రాయల్ బెంగాల్ టైగర్...సిద్ధూ సిద్ధార్థ రాయ్' అనే డైలాగ్ అప్పట్లో బాగా పాపులర్ అయిన సంగతి తెలిసిందే.