దూం దాంగా చైతు-కాజల్ ల ‘దడ’ ఆడియో వేడక

అక్కినేని నాగచైతన్య, కాజల్ హీరో హీరోయిన్లుగా అజయ్ భూయాన్ డైరెక్షన్లో కామాక్షి ఎంటర్ ప్రైజస్ అధినేత శివప్రసాద రెడ్డి నిర్మిస్తున్న 'దడ' సినిమా ఆడియో వేడుక నిన్న సాయంకాలం హైదరాబాదులోని శిల్పకళావేదికలో ఘనంగా జరిగింది. పలు సాంస్కృతిక కార్యక్రమాలతో ఈ వేడుక ప్రారంభమైంది. చిత్రంలోని పాటలను సంగీత దర్శకుడు దేవిశ్రీప్రసాద్ పాడి, అభిమానులను ఉత్సాహపరిచారు. నాగచైతన్య తాతలు అక్కినేని నాగేశ్వరరావు, డి.రామానాయుడు చేతుల మీదుగా ఈ సినిమా పాటల సీడీలను విడుదల చేశారు.

ఈ సందర్భంగా అక్కినేని మాట్లాడుతూ, తమకు కాస్త పేరు రావడానికి పది పదిహేను సినిమాల సమయం పట్టిందనీ, నాగచైతన్యకు రెండు సినిమాలతోనే ఆ పేరు వచ్చిందనీ అన్నారు. తన దృష్టిలో అభిమానులే దేవుళ్ళనీ, తమ కుటుంబాన్ని ఇన్నాళ్లుగా ఆదరిస్తున్న అభిమానులకు రుణపడి ఉన్నామనీ ఆయన అన్నారు. ఏ హీరోకైనా హ్యాట్రిక్ సక్సెస్ రావడం అరుదనీ, అది చైతన్యకు ఈ సినిమా ద్వారా నిజమవుతోందని నిర్మాత అల్లు అరవింద్ అన్నారు. హీరో రాణా చెబుతూ, చైతూ తానూ చిన్నప్పటి నుంచీ కలసి మెలసి పెరిగామనీ, చైతూ తనకు ప్రాణమనీ అన్నాడు. ఈ సినిమాతో తను పెద్ద హీరోలలో ఒకడిగా ఎదగాలని కోరుకుంటున్నానన్నాడు. ఈ వేడుకలో ఇంకా పలువురు సినీ ప్రముఖులు పాల్గొన్నారు.