కీర్తి సురేష్, దుల్కర్ హ్యాట్సాఫ్.. ఆ ఇద్దరే హీరోలు.. మాటలు రావడం లేదు.. క్రిష్

గొప్ప చిత్రంలో భాగమైనందుకు

గొప్ప ఆత్మకథా చిత్రమైన మహానటి ఓ చారిత్రాత్మక చిత్రంగా మిగిలిపోతుంది. అంతటి గొప్ప చిత్రంలో చిన్న భాగమైనందుకు ఆనందంగా ఉంది అని క్రిష్ తన సంతోషాన్ని వ్యక్తం చేశారు.

నాగ అశ్విన్ ఎంత శ్రమించారో..

మహానటి చిత్రాన్ని చూస్తున్నంత సేపు అద్భుతమైన భావోద్వేగానికి గురయ్యాను. ఆ ఫీలింగ్‌ను చెప్పడానికి మాటలు రావడం లేదు. ఈ చిత్రాన్ని ప్రతిష్ఠాత్మకంగా తెరకెక్కించడానికి దర్శకుడు నాగ అశ్విన్ ఎంత శ్రమపడ్డారో ఊహకు అందని విషయం. అద్భుతమైన విజన్‌తో సినిమాటోగ్రాఫర్ డానీ తెరపైన దృశ్యకావ్యంగా మలిచారు. వారందరిపై అచెంచలమైన గౌరవం కలుగుతున్నది.

కీర్తీ సురేష్ హ్యాట్సాఫ్

మహానటి చిత్రంలో కీర్తీ సురేష్ అద్భుతమైన భావోద్వేగాలను తన నటనతో పలికించారు. పాత్రలోకి పరకాయ ప్రవేశం చేసిన ఆమెకు హ్యాట్సాఫ్. ఓ సూపర్‌స్టార్ విషాదకరమైన కథలో ఓ యువనటి చక్కగా ఒదిగిపోయింది. అద్భుతమైన నటనను ఇంతగా ప్రదర్శించిన ఓ హీరోయిన్‌ ఇప్పటివరకు చూడలేదని చెప్పడానికి నేను సంకోచించను అని క్రిష్ ట్వీట్ చేశారు.

దుల్కర్ సల్మాన్‌ నటన సూపర్

మహానటి లాంటి గొప్ప చిత్రంలో సానుభూతి, ద్వేషం కలిగి ఉన్న జెమినీ గణేషన్ పాత్రలో నటించిన దుల్కర్ సల్మాన్‌కు తలవంచి నమస్కరిస్తున్నాను. ఆయన ప్రదర్శించిన నటనకు ముగ్దుడినయ్యాను. ప్రతికూల ప్రభావం చూపే జెమినీ పాత్రను చేసి మెప్పించాడు. నటనలో ఉత్తమ ప్రమాణాలను చాటిచెప్పాడు. కంగ్రాట్స్ దుల్కర్ అని క్రిష్ మరో ట్విట్ చేశారు.

మహానటికి నిర్మాతలే హీరోలు

ఓ ఆలోచనను ప్రగాఢ విశ్వాసంతో నమ్మిన నిర్మాతలు ప్రియాంక, స్వప్నదత్ మహానటి చిత్రాన్ని గొప్పగా మలిచారు. ఈ చిత్రానికి వారే హీరోలు అని నమ్ముతాను. అద్భుతమైన ప్రేమకథను, జీవితాన్ని, సంబంధాలను సినీ తెరపై క్లాసిక్‌గా రూపొందించడంలో వారు సక్సెస్ అయ్యారు అని క్రిష్ ట్వీట్‌లో పేర్కొన్నారు.