RGV: ఆర్జీవి వ్యూహంలో నారా లోకేశ్​కు బిగ్ షాక్... సినిమాకు లైన్ క్లియర్​.. థియేటర్లలోకి ఆ రోజే!

కాంట్రవర్శీలకు కేరాఫ్ అడ్రస్​ డైరెక్టర్​ రామ్ గోపాల్ వర్మ. ఈయన గురించి ప్రత్యేకంగా చెప్పనక్కర్లేదు. అయితే ఆయన తెరకెక్కించిన మరో వివాదాస్పద మూవీ వ్యూహం. ఏపీ రాజకీయాల నేపథ్యంలో రూపొందిన ఈ చిత్ర రిలీజ్​కు ఎదురైన అడ్డంకులన్నీ తాజాగా తొలిగిపోయాయి. విడుదలకు లైన్ క్లియర్ అయింది. వివరాల్లోకి వెళితే...

గతంలో శివ లాంటి ట్రెండ్ సెట్టింగ్ సినిమాలు తెరకెక్కించిన దర్శకుడు రామ్ గోపాల్ వర్మ ఈ మధ్య అన్నీ వివాదాస్పద సినిమాలను మాత్రమే చేస్తున్న సంగతి తెలిసిందే. వరుసగా చర్చనీయాంశంగా మారే చిత్రాలను మాత్రమే చేస్తూ టాక్ ఆఫ్ ది టౌన్​గా నిలుస్తున్నారు. పబ్లిక్ డొమైన్​​లో ఉన్న రాజకీయ నాయకులతో పాటు సినీ సెలబ్రిటీల లైఫ్ స్టోరీలను ఆధారంగా చేసుకుని కాంట్రవర్సీ చిత్రాలను చేస్తున్నారు. లేదంటే బోల్డ్​ కంటెంట్​ సబ్జెక్ట్​ ఉన్న కథలను తీస్తున్నారు.

అయితే తాజాగా ఆయన ఏపీ రాజకీయల నేపథ్యంలో వ్యూహం సినిమాను తెరకెక్కించిన సంగతి తెలిసిందే. ఈ సినిమా రిలీజ్​ కాకముందే ఎంతో కాంట్రవర్సీని అందుకుంది. దీన్ని ఆపాలని చాలా మంది ఎన్నో ప్రయత్నాలు కూడా చేశారు. ఆ మధ్యలో అయితే ఈ వ్యూహం సినిమా సెన్సార్ పనులను పూర్తి చేసుకుని రిలీజ్​కు సిద్ధమైనప్పటికీ కొన్ని అడ్డంకులను ఎదుర్కొంది. ఈ చిత్ర రిలీజ్​ను నిలిపివేవయాలని తెలుగుదేశం పార్టీ జాతీయ ప్రధాన కార్యదర్శి నారా లోకేశ్ న్యాయస్థానాన్ని ఆశ్రయించారు.

తేదేపా అధినేత చంద్రబాబు నాయుడు ప్రతిష్టను దెబ్బతీసేలా ఈ సినిమాను రూపొందించారని పిటిషన్‌లో లోకేశ్​ పేర్కొన్నారు. దీంతో వ్యూహం చిత్రం సెన్సార్ సర్టిఫికెట్​ను రద్దు చేసింది న్యాయస్థానం. ఈ మేరకు సింగిల్ బెంచ్ ఉత్తర్వులను జారీ చేసింది. అలా ఈ మూవీ ప్రేక్షకుల ముందుకు రాకుండా ఆగిపోయింది.

ఈ క్రమంలో అప్పుడు చిత్ర నిర్మాత, దర్శకుడు కూడా హైకోర్టును ఆశ్రయించి ప్రతిగా పిటిషన్ దాఖలు చేశారు. అప్పుడు సినిమాను మరోసారి క్షుణ్ణంగా పరిశీలించి సర్టిఫికేట్​ను జారీ చేయాలని సెన్సార్ బోర్డును ఉన్నత న్యాయస్థానం ఆదేశాలను జారీ చేసింది.

ఇక న్యాయస్థానం ఆదేశాల మేరకు మరోసారి వ్యూహం సినిమాను వీక్షించిన సెన్సార్ బోర్డు తాజాగా యూ సర్టిఫికేట్​ను జారీ చేసింది. దీంతో వ్యూహం చిత్రం రిలీజ్​కు అడ్డంకులు తొలగిపోయాయి. ఈ చిత్రం ఇక ఈ నెల 16న విడుదలకు సిద్ధంగా ఉంది.

ఇకపోతే రామ్ గోపాల్ వర్మ ఎంతో ప్రతిష్టాత్మకంగా తెరకెక్కించిన ఈ చిత్రంలో అజ్మల్, మానస ప్రధాన పాత్రల్లో నటించారు. ధనంజయ్ ప్రభునే, సురభి ప్రభావతి, రేఖ సురేఖ కూడా ఇతర పాత్రల్లో నటించారు. రామదూత క్రియేషన్స్‌ బ్యానర్‌పై ప్రముఖ నిర్మాత దాసరి కిరణ్ కుమార్ ఈ చిత్రాన్ని ప్రొడ్యూస్ చేశారు.

గతంలో ఉమ్మడి ఆంధ్రప్రదేశ్ రాష్ట్ర ముఖ్యమంత్రిగా ఉన్న వైఎస్ రాజశేఖర్ రెడ్డి మరణాంతరం రాష్ట్ర రాజకీయాలు ఏ విధంగా మారాయి, ఆయన కుమారుడు వైఎస్ జగన్మోహన్ రెడ్డి రాజకీయాల్లోకి ఎలా వచ్చారు, రాగానే ఏం చేశారనే కథతో ఈ చిత్రాన్ని తెరకెక్కించారు. వైఎస్ జగన్మోహన్ రెడ్డి పాదయాత్రను ప్రారంభించి ఎలా ఆంధ్రప్రదేశ్ ముఖ్యమంత్రి అయ్యారనే దాన్ని ఇందులో చూపించనున్నారు.