సుమన్ వద్దే అన్నీ..ప్రభాకర్

తన మిత్రుడు సుమన్ వద్ద రచన, దర్శకత్వం గురించి తెలుసుకున్నాననీ, కష్టపడే తత్వం కూడా ఆయన వద్ద నుంచే తనకు అబ్బిందనీ ఈటీవీ ప్రబాకర్ అన్నారు. ఆయన సమక్షంలోనే తన సంస్థ ప్రారంభోత్సవం చేయాలని అనుకున్నప్పటికీ ఆయన ఔట్ డోర్ లో ఉన్నారనీ, ఈనెల 25(ఈ రోజు) నుంచి ముద్దు బిడ్డ సీరియల్ ప్రసారమవుతున్న నేపథ్యంలో అనివార్య పరిస్థితులలో ఈ కార్యక్రమం జరుపుతున్నామనీ చెప్పారు. అలాగే సుమన్ పేరు కలిసి వచ్చేలా సుమనోహర ప్రొడక్షన్స్ బ్యానర్ టైటిల్ తో తన సంస్థను ఏర్పాటు చేసినట్టు తెలిపారు. ఫిల్మ్ నగర్ కల్చరర్ సెంటర్ లో ఏర్పాటు చేసిన మీడియా మీట్ లో ప్రభాకర్ మాట్లాడుతూ ఈ విషయాలను చెప్పుకొచ్చారు.

నటుడు, దర్శకుడు ప్రదీప్ ద్వారా తాను బుల్లితెరకు పరిచయమయ్యాయనీ, మంజులానాయుడు దర్శకత్వంలో రూపొందిన 'రుతురాగాలు' సీరియల్ తనకు మంచి పేరు తెచ్చిందనీ అన్నారు. నటనలో ఎన్నో మెలకువలు మంజులానాయుడు దర్శకత్వంలోనే నేర్చుకున్నానని అన్నారు. నేను హఠాత్తుగా టీవీ స్క్రీన్ పై మాయమవటంతో రకరకాల రూమర్స్ వచ్చాయని, అవన్నీ నిజం కావని అన్నారు. అలాగే తాను తమ బ్యానర్ పై టీవీ సీరియల్స్ మాత్రమే కాక సినిమాలు, రియాలిటీ షో లు కూడా తీస్తామని అన్నారు. సుమన్ కి జీవితాంతం రుణపడి ఉంటానని అన్నారు.