యూఎస్ఏ : టాప్ 4లో మహేష్ ‘1’...టికెట్ ధర తగ్గింపు!

న్యూయార్క్: మహేష్ బాబు నటించిన '1 నేనొక్కడినే' చిత్రం యూఎస్ బాక్సాఫీసు వద్ద మంచి ఫలితాలనే సాధిస్తోంది. తాజాగా ఈచిత్రం అమెరికాలో విడుదలై తొలి రెండు వారాల్లో అత్యధిక వసూళ్లు సాధించిన తెలుగు సినిమా జాబితాలో టాప్ 4 స్థానాన్ని దక్కించుకుంది. ఈ సందర్భంగా ఈ చిత్రాన్ని ఓవర్సీస్‌లో విడుదల చేసిన Ficus సంస్థ ఆడియన్స్‌కు కృతజ్ఞతలు తెలిపింది.

ఇక మూడో వారంలో అమెరికా వ్యాప్తంగా ఈ చిత్రాన్ని 50 స్క్రీన్లలో ప్రదర్శిస్తున్నట్లు Ficus సంస్థ ప్రకటించింది. అదే విధంగా జనవరి 24వ తేదీని నుండి టికెట్ ధర కూడా తగ్గించినట్లు తెలిపింది. పెద్దలకు 10 డాలర్లు, పిల్లలకు 6 డాలర్లుగా టికెట్ ధర నిర్ణయించినట్లు Ficus సంస్థ ఒక ప్రకటనలో పేర్కొంది.

'1 నేనొక్కడినే' సినిమా వివరాల్లోకి వెళితే.....సుకుమార్ దర్శకత్వం వహించిన ఈ చిత్రాన్ని 14 రీల్స్ ఎంటర్టెన్మెంట్స్ పతాకంపై రామ్ ఆచంట, గోపీచంద్ ఆచంట, అనిల్ సుంకర నిర్మించారు. దేవిశ్రీ ప్రసాద్ సంగీతం అందించారు. సంక్రాంతి సందర్భంగా జనవరి 10న ఈ చిత్రం విడుదలైంది.

సినిమా సైకలాజికల్ థ్రిల్లర్ కథాంశంతో కూడిన పూర్తి టెక్నికల్ బేస్డ్ ఫిల్మ్ కావడంతో.....మాస్ మసాలా, కామెడీ ఇష్టపడే మన మెజారిటీ జనాలకు ఎక్కలేదు. అయితే సినిమా విలువలు తెలిసిన వాళ్లు మాత్రం హాలీవుడ్ లెవల్లో అద్భుతంగా ఉందని మెచ్చుకున్నారు.