పాపం అన్నికోట్లొచ్చీ ఏం లాభం లేదు: ఫిదా లెక్కలు చూస్తే కళ్ళు తిరుగుతాయ్

ఫిదా

మెగా ఫ్యామిలీ హీరో వరుణ్ తేజ్, సాయిపల్లవి కాంబినేషన్‌లో శేఖర్ కమ్ముల దర్శకత్వంలో దిల్ రాజు నిర్మించిన చిత్రం "ఫిదా". ఈ చిత్రం తెలుగు రాష్ట్రాల్లోనే కాకుండా ఓవర్సీస్‌లో సైతం కలెక్షన్ల వర్షం కురిపించింది. ఫలితంగా హైయ్యెస్ట్ గ్రాసింగ్ టాప్-10 జాబితాలో "ఫిదా" చేరిపోయింది. ముఖ్యంగా సీనియర్ హీరోలు బాలకృష్ణ నటించిన 'గౌతమీపుత్ర శాతకర్ణి', పవర్ స్టార్ పవన్ కళ్యాణ్ నటించిన "అత్తారింటికి దారేది" వంటి చిత్రాలను వెనక్కినెట్టేయడం గమనార్హం.

భారీ లాభాలేమీ రాలేదు

అయితే అంత వసూలు చేసినప్పటికీ ఈ చిత్రాన్ని కొన్న డిస్ట్రిబ్యూటర్‌గా భారీ లాభాలేమీ రాలేదు. నాలుగు కోట్లు పెట్టి రైట్స్‌ తీసుకుంటే, ఈ చిత్రంపై పదమూడు కోట్లకి పైగా గ్రాస్‌ కలక్షన్లు యుఎస్‌లో వచ్చాయి. ఇతర దేశాల నుంచి ఒక ముప్పయ్‌ లక్షలు వసూలయ్యాయి.

రిస్కు చేసిన బయ్యర్‌కి కోటీ పాతిక లక్షల లాభం

పదమూడున్నర కోట్లలో దాదాపు సగం యుఎస్‌ థియేటర్‌ ఓనర్లకే పోయింది. ఖర్చులు పోనూ లాభం మూడు కోట్లు తేలితే, అందులో ఎగ్జిబిటర్ల షేరే ఎక్కువ వుంది. కోటీ డెబ్బయ్‌ అయిదు లక్షలు ఎగ్జిబిటర్లకి పోగా, నాలుగు కోట్లు రిస్కు చేసిన బయ్యర్‌కి కోటీ పాతిక లక్షల లాభం వచ్చింది. ఇది మంచి లాభమే కానీ, ఇక్కడ బ్లాక్‌బస్టర్‌ సినిమా గురించి మాట్లాడుతున్నామని మర్చిపోకూడదు.

ఫ్లాపయితే పరిస్థితి ఏమిటి?

అంత భారీ విజయం సాధించిన చిత్రంపై ఇంత తక్కువ లాభం వస్తే ఇక మామూలు సక్సెస్‌ల మాటేమిటి? ఫ్లాపయితే పరిస్థితి ఏమిటి? పరిస్థితి ఇంత ఘోరంగా వుండబట్టే ఈ జూదం ఆడేందుకు ఎక్కువ మంది పంపిణీదారులు సాహసించడం లేదు. ఇదే బిజినెస్‌ని నమ్ముకున్న కొందరు ఉద్ధండులు రోడ్ల మీదకి వచ్చేసి క్యాబ్‌ డ్రైవర్లుగా మారిన ఉదంతాలు కూడా వున్నాయి.