‘పైసా’ మూవీ పోస్టర్లు, బ్యానర్లు దహనం

హైదరాబాద్ : తెలుగు సినీ నిర్మాత పుప్పాల రమేష్‌కు సంబంధించిన కార్యాలయంలో అగ్నిప్రమాదం సంభవించింది. ఈ సంఘటనలో కార్యాలయంలో ఉన్న 'పైసా' మూవీ పోస్టర్లు, బ్యానర్లు దహనం అయ్యాయి. దాదాపు రూ. 5 లక్షల మేర ఆస్తినష్టం సంభవించినట్లు తెలుస్తోంది. అయితే ఈ ప్రమాదం ఎలా సంభవించింది అనేదానిపై పోలీసులు కేసు నమోదు చేసుకుని దర్యాప్తు చేస్తున్నారు.

నాని హీరోగా రూపొందుతున్న 'పైసా' మూవీని పుప్పాల రమేష్ ఎల్లోఫ్లవర్స్ బేనర్‌పై నిర్మిస్తున్నారు. ప్రముఖ దర్శకుడు కృష్ణవంశీ దర్శకత్వం వహిస్తున్న ఈచిత్రం ఈ నెల 3వ వారంలో విడుదల కావాల్సి ఉంది. అందులో భాగంగానే పోస్టర్లు, బేనర్లు తయారు చేసి పెట్టారు.

ఈ సినిమాలో నాని సరసన కేథరీన్ అనే కొత్త అమ్మాయి నటిస్తుంది. ఈ చిత్రంలో నాని పేరు... ప్ర'క్యాష్'(Pra'cash'). డబ్బు కంటే అతనికి ఏదీ ఎక్కువ కాదు. ఈచిత్రంలో నాని యంగ్ పొలిటీషియన్‌గా కనిపించబోతున్నాడు. దర్శకుడు కృష్ణ వంశీ మార్కుకు ఏమాత్రం తగ్గకుండా ఈచిత్రం ఉండబోతోంది. అన్ని కోణాల్లో తనదైన ముద్దవేస్తూ ఈచిత్రాన్ని తెరకెక్కిస్తున్నారు.