గబ్బర్ సింగ్-2 : సంపత్ మదిలో ‘బెంగాల్ టైగర్’?

By Bojja Kumar

Published: Thursday, June 20, 2013, 16:38 [IST]

హైదరాబాద్ : తన మూడో సినిమాకే పవన్ కళ్యాణ్‌తో సినిమా చేసే అవకాశం దక్కించుకున్నాడు దర్శకుడు సంపత్ నంది. ఈ రోజు ఆయన పుట్టిన రోజు. ఈ సందర్భంగా ఆయన మీడియాతో మాట్లాడుతూ....ప్రస్తుతం తను చేస్తున్న 'గబ్బర్ సింగ్-2' చిత్రం గురించి ఆసక్తికర విషయాలు చెప్పుకొచ్చారు.

'గబ్బర్ సింగ్-2' చిత్రం సరికొత్త కథతో చేస్తున్నామని చెప్పిన సంపత్......ఈ సినిమా గబ్బర్ సింగ్ చిత్రానికి ప్రీక్వెల్ గానీ, సీక్వెల్ గానీ కాదని స్పష్టం చేసాడు. జేమ్స్ బాండ్ సిరీస్ సినిమాలు దేనికది ఎలా ప్రత్యేకమో, గబ్బర్ సింగ్-2 చిత్రం కూడా ప్రత్యేకమైన కథతో తెరకెక్కిస్తున్నట్లు తెలిపారు.

గబ్బర్ సింగ్-2 ఆలోచన తనది కాదని, తాను వేరే కథతో పవన్ కళ్యాన్ ను కలిస్తే.....ముందు గబ్బర్ సింగ్-2 చేసిన తర్వాత ఆ సినిమా చేద్దామని పవన్ కళ్యాణ్ చెప్పాడట. పవన్ కోరిక మేరకు గబ్బర్ సింగ్ -2 చిత్రం కోసం 2 నెలల్లో స్క్రిప్టు రెడీ చేసాడు సంపత్ నంది. ఆయన మాటలు బట్టి గబ్బర్ సింగ్-2 చిత్రం తర్వాత ఆయనతో పవన్ మరో సినిమా చేయబోతున్నాడన్నమాట.

మరో ఆసక్తికర విషయం ఏమిటంటే.....సంపత్ నంది మదిలో 'బెంగాల్ టైగర్' అనే టైటిల్ ఆలోచన ఉందట. అవకాశం వస్తే 'గబ్బర్ సింగ్-2' టైటిల్ 'బెంగాల్ టైగర్'గా మారుస్తానని అంటున్నాడు. అయితే ఈ విషయాన్ని తాను ఇప్పుడే ఖరారు చేయలేనని స్పష్టం చేస్తున్నాడు సంపత్. 'ఖుషి' చిత్రంలో పవన్ చెప్పిన 'ఐయామ్ రాయల్ బెంగాల్ టైగర్...సిద్ధూ సిద్ధార్థ రాయ్' అనే డైలాగ్ అప్పట్లో బాగా పాపులర్ అయిన సంగతి తెలిసిందే.

More from Filmibeat