విలన్ గా 'గోపీచంద్'?

By Staff

Published: Wednesday, September 9, 2009, 17:48 [IST]

యాక్షన్ హీరోగా మాస్ లో మంచి ఫాలోయింగ్ వున్న హీరో గోపీచంద్. తొలుత హీరోగా 'తొలిప్రేమ' చిత్రం ద్వారా పరిచయమైన గోపి, ఆ చిత్రం ఆశించిన ఫలితం ఇవ్వకపోయేసరికి విలన్ గా అవతారమెత్తాడు. తేజ దర్శకత్వంలో వచ్చిన జయం చిత్రంలో విలన్ గా నటించిన గోపీచంద్, విలన్ గా రాణించడమే కాకుండా ఆ సంవత్సరానికి గాను ఉత్తమ ప్రతినాయకుడిగా నంది అవార్డు అందుకున్నాడు. ఆ తర్వాత 'నిజం', 'వర్షం' చిత్రాలలో కూడా విలన్ గా రాణించాడు.

కథానాయకుడిగా 'యజ్ఞం' చిత్రం ద్వారా సెకెండ్ ఇన్నింగ్స్ ప్రారంభించిన గోపీ ఆ చిత్రం విజయవంతం అవడంతో కథానాయకుడిగానే కొనసాగుతూ వచ్చాడు. ఈ క్రమంలో 'ఆంధ్రుడు', 'రణం', 'ఒక్కడున్నాడు', 'లక్ష్యం', 'ఒంటరి' వంటి విజయవంతమైన చిత్రాలలో నటించాడు. తాజా అందిన సమాచారం ప్రకారం గోపీచంద్ మరో సారి విలన్ గా నటించబోతున్నాడు. వెంకటేష్, శ్రీను వైట్లల కాంబినేషన్ లో వస్తున్న 'నమో వెంకటేశా' చిత్రంలో గోపీచంద్ ప్రతినాయకుడిగా నటిస్తున్నాడట. నటుడిగా తాను ఎలాంటి ఇమేజ్ లో ఇరుక్కోకుండా గోపితీసుకున్న నిర్ణయం అభినందనీయం...

More from Filmibeat