రానా కొత్త గెటప్: 'హాథీ మేరే సాథీ' ఫస్ట్ లుక్.. డీ-గ్లామర్ పాత్రలో కనిపించబోతున్నాడా?

డీ-గ్లామర్‌ లుక్..:

'హాథీ మేరే సాథీ'లో రానా ఫస్ట్ లుక్ డిఫరెంట్ గా ఉందనే చెప్పాలి. ఇప్పటిదాకా ఆన్ స్క్రీన్ రానా ఎలా కనిపించాడో.. దానికి పూర్తి భిన్నంగా డీ-గ్లామర్‌గా కనిపిస్తున్నాడు. చూడబోతే.. మావటి పాత్రలో కనిపించబోతున్నాడేమో అనిపిస్తోంది.

రాజేష్ ఖన్నా సినిమాకు రీమేక్..:

1971లో రాజేష్ ఖన్నా హీరోగా వచ్చిన 'హాథీ మేరే సాథీ' చిత్రానికి రీమేక్ ఈ తాజా చిత్రం. క్లాసిక్ చిత్రంగా నిలిచిపోయిన ఈ చిత్రానికి ప్రభు సోలోమాన్ రీమేక్ ట్రీట్ మెంట్ ఎలా ఉండబోతుందోనన్న ఆసక్తి నెలకొంది.

ఒకేసారి మూడు భాషల్లో..:

గతంలో తమిళంలో కుంకీ(గజరాజు) సినిమాను తెరకెక్కించిన ప్రభు సోలోమాన్.. ఆ సినిమాతో మంచి హిట్ అందుకున్నారు. ఏనుగులతో చిత్రాలను తెరకెక్కించడానికి మొగ్గుచూపే ప్రభు.. ఈసారి రానాతో ఎలాంటి మ్యాజిక్ చేస్తారో చూడాలి.

తెలుగు, హిందీ, తమిళ భాషల్లో తెరకెక్కుతున్న ఈ చిత్రాన్ని ఒకేసారి మూడు భాషల్లో రిలీజ్ చేయనున్నారు. దీపావళి కానుకగా రిలీజ్ చేయడానికి సన్నాహాలు చేసుకుంటున్నట్లు తెలుస్తోంది.

కలిసొచ్చిన 2017:

బాహుబలి-2, ఘాజీ చిత్రాలతో 2017లో తన కెరీర్‌లో గుర్తుండిపోయే సినిమాలు చేశాడు రానా. అలాగే నేనే రాజు నేనే మంత్రి సినిమాతో మంచి హిట్ సొంతం చేసుకున్నాడు.

విభిన్న చిత్రాలు..:

ప్రస్తుతం తెలుగు, తమిళ భాషల్లో రూపొందుతున్న ఓ చారిత్రక చిత్రంలో రానా నటిస్టున్నాడు. నేతాజీ సుభాష్ చంద్రబోస్ సైన్యంలో జరిగే ఓ సైనికుడి ప్రేమకథ ఆధారంగా ఈ చిత్రాన్ని తెరకెక్కిస్తున్నట్లు సమాచారం. 1945 కాలం నాటి పరిస్థితులకు అద్దం పట్టేలా ఈ చిత్రం ఉంటుందని తెలుస్తోంది.

మలయాళంలో..:

తెలుగు, తమిళ భాషల్లో తెరకెక్కుతున్న మరో పీరియాడికల్ డ్రామా చిత్రంలోనూ రానా నటిస్తున్నాడు. కేరళ ట్రావెన్కోర్ ప్రాంతానికి చెందిన మహారాజ తిరునాళ్ మార్తాండ్ వర్మ పాత్రను రానా ఇందులో పోషించనున్నాడు. ఇక మలయాళంలోనూ ఓ చిత్రంలో నటిస్తుండటం విశేషం.