HBD Chiranjeevi: చిరంజీవి ఆస్తులు, రెమ్యూనరేషన్ వివరాలివే.. ఏకైక ఇండియన్ హీరోగా రికార్డు

చిరంజీవి కుటుంబ నేపథ్యం ఇదే

మెగాస్టార్ చిరంజీవి 1955 ఆగస్టు 22న ఆంధ్రప్రదేశ్‌లోని పశ్చిమ గోదావరి జిల్లా మొగల్తూరులో వెంకట్రావు, అంజనా దేవి దంపతులకు జన్మించారు. ఆయన 1980లో అల్లు రామలింగయ్య కుమార్తె సురేఖను వివాహం చేసుకున్నారు. చిరంజీవికి ఇద్దరు కుమార్తెలు, ఒక కుమారుడు ఉన్నారు. అలాగే, ఆయనకు పవన్, నాగబాబుతో పాటు ఇద్దరు సోదరీమణులు కూడా ఉన్నారు.

అలా ఎంటర్.. ఆ మూవీతో స్టార్‌గా

మెగాస్టార్ చిరంజీవి 1978లో ‘పునాదిరాళ్లు' సినిమాతో తెలుగు సినీ పరిశ్రమలోకి ప్రవేశించారు. ఆ తర్వాత కొన్ని సినిమాలు చేసినప్పటికీ పెద్దగా గుర్తింపు దక్కలేదు. అయితే, 1983లో వచ్చిన ‘ఖైదీ' అనే సినిమా.. చిరంజీవిని కెరీర్‌ను మార్చేసింది. ఇందులో ఆయన నటనకు తెలుగు ప్రేక్షకులు ఫిదా అయిపోయారు. అలాగే, ఈ చిత్రంతోనే ఆయన స్టార్‌గా ఎదిగిపోయారు.

చిరు కెరీర్‌ మార్చేసిన మూవీలివే

‘ఖైదీ' తర్వాత చిరంజీవికి ఎన్నో హిట్లు వచ్చాయి. వాటిలో ‘చంటబ్బాయ్‌', ‘ఛాలెంజ్‌', ‘అభిలాష', ‘శుభలేఖ', ‘గ్యాంగ్‌ లీడర్‌', ‘రౌడీ అల్లుడు', ‘ఘరానా మొగుడు', ‘స్వయం కృషి', ‘రుద్రవీణ', ‘యముడికి మొగుడు', ‘అత్తకు యముడు.. అమ్మాయికి మొగుడు', ‘జగదేక వీరుడు అతిలోక సుందరి', ‘ఇంద్ర', ‘ఠాగూర్‌' పేరు తెచ్చాయి.

రాజకీయాల్లో మాత్రం అట్టర్ ఫ్లాప్

స్టార్ హీరోగా కొనసాగుతున్న సమయంలోనే మెగాస్టార్ చిరంజీవి 2008 ఆగస్టులో ‘ప్రజా రాజ్యం' పార్టీని స్థాపించారు. 2009లో జరిగిన సార్వత్రిక ఎన్నికల్లో ఎమ్మెల్యేగా గెలిచారు. అయితే, 2011 ఫిబ్రవరిలో ‘ప్రజా రాజ్యం' పార్టీని ‘కాంగ్రెస్‌'లో వీలీనం చేశారు. ఆ తర్వాత 2012 మార్చిలో రాజ్యసభకు ఎన్నికై కేంద్ర పర్యాటకశాఖా మంత్రిగానూ బాధ్యతలు నిర్వహించారు.

సినిమాల్లోకి రీఎంట్రీ.. ఫుల్ స్పీడ్

రాజకీయాల కోసం సినిమాలకు దూరమైన మెగాస్టార్ చిరంజీవి.. ‘ఖైదీ నెంబర్ 150'తో రీఎంట్రీ ఇచ్చారు. ఇది మంచిగా ఆడడంతో ఆయన రెట్టించిన ఉత్సాహంతో సినిమాలు చేస్తున్నారు. ఈ క్రమంలోనే ‘సైరా: నరసింహారెడ్డి' అనే సినిమాను చేశారు. దీని తర్వాత అంటే ఇటీవలే ‘ఆచార్య' అనే మూవీని చేశారు. కానీ, ఇది ఆయన కెరీర్‌లోనే బిగ్గెస్ట్ డిజాస్టర్‌గా మిగిలిపోయింది.

ఏకంగా మూడు సినిమాలతో బిజీ

మెగాస్టార్ చిరంజీవి ప్రస్తుతం మోహన్ రాజాతో ‘గాడ్ ఫాదర్' అనే సినిమాను చేస్తున్నారు. ఈ షూటింగ్ దాదాపుగా పూర్తైంది. దీనితో పాటు మెహర్ రమేష్‌తో ‘భోళా శంకర్' అనే మూవీ కూడా చేస్తున్నారు. ఇది కూడా చాలా వరకు షూట్ కంప్లీట్ చేసుకుంది. అలాగే, బాబీతో ‘వాల్తేరు వీరయ్య' అనే సినిమా చేస్తున్నారు. ఇందులో మాస్ మహారాజా రవితేజ కూడా నటిస్తున్నాడు.

చిరుకు ఎన్నో ఉత్తమ గౌరవాలు

చిరంజీవిని 2006లో పద్మభూషణ్‌ పురస్కారంతో ఆయనను సత్కరించింది. 2006లో ఆంధ్ర విశ్వవిద్యాలయం నుంచి గౌరవ డాక్టరేటును అందుకున్నారు. వీటితో పాటు జాతీయ, రాష్ట్రస్థాయి అవార్డులు, నంది, ఫిల్మ్‌ఫేర్‌ అవార్డులు ఆయనను వరించాయి. అలాగే, ఈ సినీ ప్రయాణంలో చిరంజీవి ఎన్నో రికార్డులను తన ఖాతాలో వేసుకుని దేశంలోనే టాప్ హీరోగా వెలుగొందుతున్నారు.

సేవలతో ప్రాణదాత అనిపించేలా

చిరంజీవి అప్పట్లో బ్లడ్ బ్యాంక్‌ను ఏర్పాటు చేశారు. ఆ తర్వాత ఐ (కంటి) బ్యాంక్‌ను కూడా స్థాపించారు. వీటి ద్వారా ఎంతో మందికి ప్రాణాన్ని, చూపును అందించి ప్రాణదాతగా మారారు. అలాగే, కష్ట సమయంలో విరాళాలు ఇచ్చి అండగా నిలబడ్డారు. కరోనా సమయంలో సినీ పరిశ్రమకు పెద్ద దిక్కయ్యారు. ఇక, ఇప్పుడు సినీ కార్మికుల కోసం ఏకంగా ఆస్పత్రినే కట్టిస్తానని హామీ ఇచ్చారు.

ఇండియాలో ఏకైక హీరోగా రికార్డ్

మెగాస్టార్ చిరంజీవి ఎన్నో సినిమాల్లో మాస్ డ్యాన్స్‌తో మెప్పించారు. ఈ క్రమంలోనే ‘పసివాడి ప్రాణం' చిత్రం ద్వారా తెలుగు తెరకే కాదు.. ఇండియా మొత్తానికే తొలిసారి ‘బ్రేక్‌ డ్యాన్స్‌'ను పరిచయం చేశారు. అలాగే, ఎన్నో సినిమాల్లో అద్భుతమైన కలెక్షన్లతో రికార్డులు క్రియేట్ చేశారు. అలాగే, ఎక్కువ కేంద్రాల్లో 100 రోజులు ఆడిన సినిమాలు కూడా చిరంజీవివే ఎక్కువున్నాయి.

చిరు ఆస్తులు, రెమ్యూనరేషన్ ఇలా

మెగాస్టార్ చిరంజీవికి దాదాపు రూ. 1800 కోట్ల ఆస్తులు ఉన్నట్లు ఓ టాక్ ఉంది. అలాగే, దాదాపు 100 కోట్ల విలువున్న ప్రాపర్టీలు కూడా ఉన్నాయట. అలాగే, కార్లు, ఇల్లు మిగతా యాక్ససిరీస్‌ల విలువ 200 - 300 కోట్లు ఉంటుందట. అంతేకాదు, మెగాస్టార్ చిరంజీవి ఇప్పుడు ఒక్కో సినిమాకు రూ. 30 కోట్లు రెమ్యూనరేషన్ తీసుకుంటున్నారని ఇండస్ట్రీలో ప్రచారం జరుగుతోంది.

ఇలా ఎన్నో సినిమాలు చేసి ప్రేక్షకులను అలరిస్తూ.. ప్రజాసేవలోనూ ముందుంటూ ఆదర్శంగా నిలవాలని కోరుకుంటూ ఫిల్మీబీట్ తరపున మెగాస్టార్ చిరంజీవికి పుట్టినరోజు శుభాకాంక్షలు.