ఆ సినిమాలపై చర్యలు తీసుకోండి..హైకోర్టు

"కొన్ని సినిమాలు నేరాలు పెరగడానికి దోహదం చేస్తున్నాయి. వరంగల్‌ యాసిడ్‌ దాడి వంటి సంఘటనను ఓ సినిమాలో చిత్రించారు. వివిధ టీవీ ఛానళ్లలో అది ప్రసారమైంది. చట్ట ప్రకారం వీటిని అరికట్టే మార్గాలుంటే పరిశీలించి.. చర్యలు తీసుకోండి'' అని హైదరాబాద్‌ పోలీసు కమిషనర్‌కు హైకోర్టు బెంచ్‌ సూచించింది. సినిమాల్లో స్త్రీలను అసభ్యంగా చూపడం, వారి అశ్లీల చిత్రాలను పోస్టర్ల రూపంలో, పత్రికల్లో ప్రచురించడాన్ని నిరోధించడానికి ఎలాంటి చర్యలు చేపడుతున్నదీ తెలియజేయమంటూ ప్రభుత్వాన్ని రాష్ట్ర హైకోర్టు శుక్రవారం ఆదేశించింది. డీజీపీ, హోం శాఖ కార్యదర్శి, హైదరాబాద్‌ పోలీసు కమిషనర్‌, ఫిలిం సెన్సార్‌ బోర్డులకు నోటీసులు జారీ చేసింది. ఫిబ్రవరి 9వ తేదీలోగా వివరణ ఇవ్వాలని వారందరినీ ఆదేశించింది.

సినిమాల్లో అశ్లీలతపై ప్రజాసత్తా అనే స్వచ్ఛంద సంస్థ వ్యవస్థాపకుడు అహమ్మద్‌ వలీ షేక్‌ రాసిన లేఖను హైకోర్టు సుమోటోగా స్వీకరించింది. దీనిపై హైకోర్టు చీఫ్‌ జస్టిస్‌ అనిల్‌ రమేశ్‌ దవె, జస్టిస్‌ ఆర్‌.సుభాష్‌రెడ్డిలతో కూడిన డివిజన్‌ బెంచ్‌ శుక్రవారం విచారణ జరిపింది. సెన్సార్‌ బోర్డు మీద పిటిషనర్‌ ఎలాంటి ఫిర్యాదు చేయలేదని అసిస్టెంట్‌ సొలిసిటర్‌ జనరల్‌ రాజశేఖరరెడ్డి వ్యాఖ్యానించగా.. పిటిషనర్‌ పంపిన చిత్రాలన్నీ సెన్సారైన సినిమాల్లోనివేనని బెంచ్‌ వ్యాఖ్యానించింది. ఇదిలాఉండగా, పత్రికల్లో ప్రచురితమవుతున్న చిత్రాలపై అభ్యంతరాలు తెలియజేస్తూ కృష్ణా జిల్లాలోని వివిధ జూనియర్‌ కళాశాలలకు చెందిన 486 మంది విద్యార్థులు హైకోర్టుకు లేఖలు రాశారని.. వాటిని కూడా ఈ పిటిషన్‌కు జత చేసినట్లు ఆంధ్రప్రదేశ్‌ న్యాయసేవాధికార సంస్థ కార్యదర్శి డి.సుబ్రహ్మణ్యం తెలిపారు.