చంద్రబాబు..సురేష్‌గోపీ షాక్

By Staff

| Published: Friday, April 3, 2009, 18:57 [IST]

క్రిందటి ఎలక్షన్ లో చంద్రబాబు నాయుడును తెలుగు ప్రజలు ఎందుకు ఓడించారన్నది తనకు ఇప్పటికీ అర్థంకాని విషయమని మలయాళ కథానాయకుడు సురేష్‌ గోపీ ఆశ్చర్యం వెల్లబుచ్చారు. 'ఆ ఒక్కడు' చిత్రం షూటింగ్‌ నిమిత్తం హైదరాబాద్‌ వచ్చిన ఆయన లోకల్ మీడియాతో మాట్లాడారు. ఆ సందర్భంగా ఆంధ్రప్రదేశ్‌ రాజకీయాల గురించి ప్రస్తావిస్తూ 'ఎన్టీఆర్‌ రాష్ట్రాన్ని ఎంతో ముందుకు తీసుకువెళ్లారు. దానిని చంద్రబాబు కొనసాగించారు.

చంద్రబాబు హయాంలో ఆంధ్రప్రదేశ్‌ చాలా అభివృద్ధి చెందింది. చంద్రబాబు అధికారంలో ఉండగా రైతుల గురించి పట్టించుకోనట్లయితే, తమ సమస్యల విషయంలో చంద్రబాబు స్పందించేలా రైతులు ఉద్యమిస్తే బాగుండేది' అని అన్నారు. అలాగే ప్రజారాజ్యం పార్టీ గురించి మాట్లాడుతూ, 'చిరంజీవి తెరమీద చాలా గొప్పవాడు. ఆయన నిజ జీవితం గురించి నాకు తెలియదు. ఆయన నిజ జీవితంలో కూడా గొప్పవాడైతే నాయకునిగా కూడా ఎదుగుతారు' అని సురేష్‌ గోపీ చెప్పారు. వ్యక్తిగతంగా తాను కామరాజ్‌ నాడార్‌, ఇందిరా గాంధీలను ఎంతో అభిమానిస్తానని అన్నారు.