'స్లమ్‌డాగ్‌'ని రిలీజ్ చేయద్దు!

నాలుగు గోల్డెన్‌ గ్లోబ్‌ అవార్డులను,పది ఆస్కార్ నామినేషన్స్ ని పొంది అంతటా ప్రశంసలు పొందుతున్న స్లమ్‌డాగ్‌ మిలియనీర్‌ చిత్రం ఈ రోజు(శుక్రవారం) దేశమంతటా రిలీజ్ కానున్న సంగితి తెలిసిందే. అయితే ఈ చిత్ర విడుదలను నిలిపివేయాలని హిందూ జనజాగృతి సమితి (హెచ్‌జేఎస్‌) డిమాండ్‌ చేసింది. ఈ చిత్రంలోని నాలుగు సన్నివేశాలు రాముణ్ని కించపరిచేవిగా ఉన్నాయని, వాటివల్ల మత విశ్వాసాలు దెబ్బ తింటాయని వారు చెప్తున్నారు. దీని నిమిత్తం గోవాతో పాటు వివిధ రాష్ట్రాల ప్రభుత్వాలను కోరనున్నట్లు హెచ్‌జేఎస్‌ గోవా ప్రతినిధి జయేశ్‌ థాలీ చెప్పారు. దీనిపై కేంద్ర సెన్సార్‌ బోర్డుకు వినతి పత్రం కూడా సమర్ఫించామన్నారు.

ఇక ఈ చిత్ర కథ ముంబయిలోని మురికివాడకు చెందిన ఓ అనాథ..కౌన్ బనేగా కరోడ్ పతి తరహా గేమ్‌షోలో పాల్గొని మిలియనీర్‌గా ఎలా నిలిచాడన్నడనన్నది వివరిస్తుంది. అంత డబ్బు అతను ఎలా గెలుచుకున్నాడని ఛానెల్ వారు పెట్టిన కంప్లైంట్ కి పోలిసులు ఇంటరాగేషన్ చేస్తూండగా సినిమా ప్రారంభమవుతుంది. ఈ సినిమాను భారత దౌత్యాధికారి వికాస్‌ స్వరూప్‌ రాసిన 'క్యూ అండ్‌ ఏ' నవల ఆధారంగా రూపొందించారు. దేవ్‌ పటేల్‌ ముఖ్య పాత్రధారిగా నటించిన ఈ సినిమాలో బాలీవుడ్‌ నటులు అనిల్‌ కపూర్‌, ఇర్ఫాన్‌ ఖాన్‌లు ప్రధాన పాత్రలు పోషించారు.