పెద్ద హీరోలను టార్గెట్ చేస్తూ... తేజ విమర్శలు

By Bojja Kumar

Published: Wednesday, April 11, 2012, 15:07 [IST]

దర్శకుడు తేజ తెలుగు సినీ పరిశ్రమలోని అగ్రహీరోలను టార్గెట్ చేస్తూ విమర్శలు గుప్పించారు. ఓ ఇంటర్వూలో ఆయన మాట్లాడుతూ....పెద్ద హీరోలను నేను హ్యాండిల్ చేయలేను. వాటితో సినిమా తీయడం నాకు చేతకాదు అని తెగేసి చెప్పారు. ఎందుకని జర్నలిస్టు ప్రశ్నించగా......సినిమా ఎలా తీయాలనేది పూర్తిగా దర్శకుడి ఇష్టాఇష్టాల మీద ఆధార పడి ఉంటుంది. సినిమా హిట్టయినా, ప్లాపయినా పూర్తిగా అతనిదే బాధ్యత ఉంటుంది. కానీ స్టార్స్‌తో పెట్టుకుంటే కొందరు పండితులు, హీరోలు సినిమా ఎలా తీయాలనేది వాళ్లే నిర్ణయిస్తారు. దర్శకుడు సినిమా ఎలా తీయాలనేది వాళ్లే నిర్ణయించాక ఇక మేమెందుకు? అనే రీతిలో సమాధానం ఇచ్చారు తేజ.

తన తొలి సినిమా నుంచి కొత్త నటీనటులతోనే ప్రయోగాలు చేస్తూ చిత్రం, జయం, నువ్వునేను లాంటి విజయవంతమైన చిత్రాలు రూపొందించిన తేజ తాజాగా...'నీకు నాకు డాష్ డాష్' అనే చిత్రంతో ప్రేక్షకుల ముందుకు వస్తున్నాడు. ఈ చిత్రంలో నటించేవారంతా కొత్తవాళ్లే కావడం గమనార్హం.

భవ్య క్రియేషన్స్ పతాకంపై వి. ఆనంద్ ప్రసాద్ ఈ సినిమాను నిర్మిస్తున్నారు. ప్రిన్స్, నందిత హీరో హీరోయిన్లగా పరిచయం అవుతున్నారు. ఈ చిత్రం ఏప్రిల్ 12న విడుదల చేస్తామని దర్శక నిర్మాతలు ఆ మధ్య ప్రకటించినప్పటికీ... తాజాగా ఈ చిత్రం విడుదల ఒకరోజు లేటుగా అంటే ఏప్రిల్ 13కు వాయిదా పడింది. సెన్సార్ బోర్డు నుంచి ఈచిత్రం A సర్టిఫికెట్ పొందింది.

పరుచూరి వెంకటేశ్వరరావు, తీర్థ, ధర్మవరపు సుబ్రహ్మణ్యం, తనికెళ్ల భరణి, బెనర్జీ తదితరులు నటించిన ఈ చిత్రానికి మాటలు: రామస్వామి, ఎడిటింగ్ కోటగిరి వెంకటేశ్వరరావు, సమర్పణ: వి.కృష్ణకుమారి, ఎగ్జిక్యూటివ్ నిర్మాత: అన్నే రవి.

More from Filmibeat