హైదరాబాద్ లో బాలల చలన చిత్రోత్సవం..డిటేల్స్

By Srikanya

Published: Wednesday, September 7, 2011, 10:00 [IST]

17వ ప్రపంచ బాలల చిత్రోత్సవాన్ని నవంబర్ 14 నుంచి 20 వరకు హైదరాబాద్‌లో నిర్వహిస్తున్నట్లు ఆ సంస్థ చైర్‌పర్సన్ నందితా దాస్ వెల్లడించారు. సచివాలయంలో సీఎం కిరణ్, సినిమాటోగ్రఫీ మంత్రి డీకే. అరుణలతో ఆమె కార్యక్రమం నిర్వహణపై చర్చించారు. ప్రతి రెండేళ్లకొకసారి నిర్వహించే ఈ చిత్రోత్సవాన్ని ఈ సారి హైదరాబాద్‌లో నిర్వహించనున్నట్లు తెలిపారు. వారం రోజులపాటు జరిగే ఈ ప్రదర్శనలో 40 దేశాల్లో అవార్డులు సాధించిన చిన్నపిల్లల సినిమాలు 100కు పైగా ప్రదర్శిస్తామని చెప్పారు. ఈ కార్యక్రమంలో బాల దర్శకుల్ని కూడా పరిచయం చేయబోతున్నామని చెప్పారు.

రాష్ట్ర చలన చిత్ర పరిశ్రమ అభివృద్ధి సంస్థ తరపున ఈ చిత్రోత్సవానికి అన్నివిధాలా తోడ్పాటును అందిస్తున్నట్లు మంత్రి అరుణ తెలిపారు. హైదరాబాద్‌లో గతంలో ఈ చిత్రోత్సవం జరిగినప్పుడు పలు సినిమా హాళ్లలో ప్రదర్శనలు జరిగాయని, ఫలితంగా చిన్నపిల్లలు అటు ఇటు తిరగటానికి ఇబ్బంది పడ్డారని ఆమె అన్నారు. ఇప్పుడు అలాంటి సమస్య తలెత్తకుండా శిల్పారామం లాంటి చోట్లను పరిశీలిస్తున్నామని తెలిపారు.

More from Filmibeat