పవన్ సపోర్టు ఉందా? రేణు దేశాయ్ రాకపై చర్చ...

హైదరాబాద్: 'బద్రి' సినిమాతో తెలుగు సినిమా ప్రేక్షకులకు పరిచయమైన రేణు దేశాయ్.....ఆ సినిమా షూటింగు సమయంలోనే పవన్ కళ్యాణ్‌తో ప్రేమలో పడటం, అతనితో సహజీవనం మొదలు పెట్టడం, ఓ బిడ్డకు తల్లయిన తర్వాత అతన్ని పెళ్లి చేసుకోవడం తెలిసిందే. ఆమె నటిగా కొనసాగితే ఏ స్థాయిలో ఉండేదో తెలియదు కానీ...పవన్ కళ్యాణ్ పుణ్యమా అని 'జానీ' సినిమా తర్వాత ఆమె నటిగా సినిమాలకు పూర్తిగా దూరమైంది. పవన్ కళ్యాణ్ నటించిన ఖుషి, గుడుంబా శంకర్, బాలు, అన్నవరం చిత్రాలకు కాస్ట్యూమ్ డిజైనర్‌గా పని చేసింది.

ఇటీవల ప‌వన్ కళ్యాణ్‌తో విడిపోయి మహారాష్ట్ర వెళ్లి పోయిన రేణు దేశాయ్ అక్కడ మరాఠీ చిత్రాల నిర్మాతగా అవతారం ఎత్తింది. మంగళాష్‌తక్ వన్స్ మోర్, ఇష్క్ వాలా లవ్ చిత్రాలతో నిర్మాతగా మారింది. తన కొడుకు, కూతురు అకీరా, ఆద్య ప్రాణంగా జీవిస్తోంది. చాలా కాలం తర్వాత రేణు దేశాయ్ తెలుగు ఫిల్మ్ ఇండస్ట్రీలోకి వస్తోంది.

మరాఠీలో ఆమె స్వీయ నిర్మాణ దర్శకత్వంతో తెరకెక్కించిన 'ఇష్క్ వాలా లవ్' చిత్రాన్ని తెలుగులో అనువదించేందుకు ఏర్పాట్లు చేస్తోంది. ఈ విషయాన్ని ఆమె ట్విట్టర్లో వెల్లడించారు. తెలుగు ఫ్యాన్స్ తన సినిమాను ఆదరిస్తారనే నమ్మకంతో ఉన్నట్లు ఆమె తెలిపారు. మరి రేణు దేశాయ్ నమ్మకం ఫలించాలని, ఆమె సినిమా విజయవంతం కావాలని కోరుకుందాం.

థియేటర్లపై బడా నిర్మాతలు, డిస్ట్రిబ్యూటర్ల ఆధిపత్యం నడుస్తున్న నేపథ్యంలో.....చిన్నసినిమాల విడుదల చాలా కష్టమవుతున్న సంగతి తెలిసిందే. ఈ నేపథ్యంలో రేణు దేశాయ్ సినిమా విడుదల విషయంలో పవన్ కళ్యాణ్ సపోర్టు ఉందా? అనే చర్చ సాగుతోంది.