వర్మపై జయకుమార్ కక్ష?: 'జోకర్'తో బదులు తీర్చుకుంటాడట!..

వర్మకు జయకుమార్ కౌంటర్‌:

తన జీఎస్‌టీ కాన్సెప్టును కాపీ కొట్టి సినిమా తీస్తున్న వర్మకు కౌంటర్‌గా 'డైరెక్టర్' అనే సినిమా తీయబోతున్నాడు జయకుమార్. 'కాపీ కొడుతాడు.. కానీ ప్లాప్స్ తీస్తాడు' అనేది ఈ సినిమా ట్యాగ్ లైన్.ఓ టీవి చానెల్ డిబేట్ లో ఈ విషయాన్ని ఆయన ప్రకటించాడు.

'జోకర్' దర్శకత్వంలో.. :

అయితే తాను తెరకెక్కించబోయే 'డైరెక్టర్' సినిమా వర్మను దెబ్బ కొట్టడానికో.. లేక కౌంటర్ గానో చేయడం లేదని జయకుమార్ పేర్కొనడం గమనార్హం. కాగా, ఈ 'డైరెక్టర్' సినిమకు దర్శకుడు 'జోకర్' అని పోస్టర్ పై పేర్కొన్నారు.

వర్మపై కక్షతోనేనా?:

జనవరి 26న వర్మ 'గాడ్,సెక్స్&ట్రూత్‌'ను రిలీజ్ చేయడానికి సిద్దమవగా.. దానికి పోటీగా తన సినిమా పోస్టర్‌ను విడుదల చేయబోతున్నాడు జయకుమార్. వర్మపై కక్ష కాదని చెబుతున్నప్పటికీ.. వర్మ తన కథను కాపీ కొట్టాడన్న ఆగ్రహంతోనే ఈ సినిమా తెరకెక్కిస్తున్నట్లు అర్థమవుతోంది.

జయకుమార్ 'డైరెక్టర్' కథ:

తాను తెరకెక్కించే సినిమాలో.. హీరో క్యారెక్టర్ ఒక డైరెక్టర్ అని జయకుమార్ చెబుతున్నాడు. ఫ్లాప్ సినిమాలు తీయడంలో ఆ డైరెక్టర్ ఎలా సక్సెస్ అయ్యాడనేది ఈ సినిమా కథ అంటున్నాడు.

వర్మ 'జోకర్' అన్నందుకేనా..:

మరోవైపు వర్మ మాత్రం జయకుమార్ కాపీ ఆరోపణలను తిప్పికొట్టాడు. జయకుమార్‌ను ఓ జోకర్‌గా అభివర్ణించారు. వర్మ వ్యాఖ్యలపై జయకుమార్ కూడా ఘాటుగానే స్పందించాడు. 'మంచిదే నేను జోకర్‌నే.. అయితే వర్మ నా బ్యాట్‌మన్' అంటూ వ్యాఖ్యానించాడు. వర్మ తననలా అవమానించినందుకే జయకుమార్ ఇప్పుడీ సినిమా మొదలుపెట్టాడేమో అంటున్నారు.

రిలీజ్ అయితే ఇంకెంత దుమారమో!:

వివాదాల సంగతెలా ఉన్నా.. వర్మ మాత్రం రేపు ఉదయం 'గాడ్,సెక్స్&ట్రూత్‌' రిలీజ్ కు సిద్దమైపోయాడు. ఇప్పటికే వివాదాల్లో నానుతున్న ఈ సినిమా విడుదల తర్వాత ఇంకెన్ని వివాదాలను కొనితెచ్చుకుంటుందోనన్న వాదన కూడా లేకపోలేదు.

అందరు అనుకుంటున్నట్లే వర్మ జీఎస్‌టీని పచ్చిగా తెరకెక్కించాడా?.. లేక ఫిలాసఫీ ప్రధానంగా తెరకెక్కించాడా? అనేది తెలియాలంటే మరికొద్ది గంటలు వేచి చూడాల్సిందే.