మహేశ్ సినిమా వల్లే దేశం మొత్తం ఇలాంటి పరిస్థితి వచ్చింది: జర్నలిస్ట్ సంచలన ట్వీట్‌

భారీ చలానాలు

ప్రజల ప్రాణాలు కాపాడటమే లక్ష్యంగా మోటారు వాహనాల సవరణ బిల్లును రూపొందించారు. బిల్లు ఆమోదంతో గతంలో ఉన్న జరిమానాలను భారీగా పెంచారు. వాహనదారులకు కౌన్సెలింగ్‌ ఇచ్చేందుకు రవాణాశాఖ ప్రత్యేకంగా చర్యలు తీసుకుంటోంది. ఇందులో భాగంగానే భారీ స్థాయిలో చలానాలు విధిస్తున్నారు.

తెలుగు సినిమా ఇండస్ట్రీని నిందిస్తూ ట్వీట్

ప్రస్తుతం దేశంలో ఈ పరిస్థితి తలెత్తడానికి తెలుగు సినిమా ఇండస్ట్రీనే కారణం అని రాహుల్ రౌషన్ అనే జర్నలిస్ట్ ట్వీట్ చేశాడు. అందులో మహేశ్ బాబు నటించిన ‘భరత్ అనే నేను' హిందీ డబ్బింగ్ వర్షన్‌కు సంబంధించిన వీడియో క్లిప్‌ను ఉంచాడు. అంతేకాదు, ‘ట్రాఫిక్ పోలీసులు విధిస్తున్న భారీ చలానాలకు తెలుగు సినిమా ఇండస్ట్రీనే నిందించాలి' అని పేర్కొన్నాడు. అయితే, ఇందులో అతడు తెలుగును సరిగా రాయకపోవడం గమనార్హం.

హిందీలో డబ్బింగ్

తెలుగులో ఘన విజయం సాధించిన ‘భరత్ అనే నేను' సినిమాను హిందీలో ‘డాషింగ్ సీఎం భరత్' అనే పేరుతో డబ్బింగ్ చేశారు. దీనికి మంచి రెస్పాన్స్ వచ్చింది. దీంతో ఈ సినిమా యూట్యూబ్‌లో 62 మిలియన్ వ్యూస్ సాధించింది. అలాగే, దాదాపు నాలుగు లక్షలు లైకులను కూడా అందుకుంది.

మహేశ్ బాబు సినిమాలో..

మహేశ్ బాబు - కొరటాల శివ కాంబినేషన్‌లో వచ్చిన ‘భరత్ అనే నేను' సినిమాలో ట్రాఫిక్ రూల్స్‌కు సంబంధించిన ఓ సీన్ ఉంటుంది. ఇందులో మహేశ్ బాబు సీఎంగా సంచలన నిర్ణయం తీసుకుంటాడు. దీని ప్రకారం.. ట్రాఫిక్ రూల్స్ పాటించని వారిపై భారీ స్థాయిలో జరిమానాలు విధించమని చెబుతాడు. ఈ సీన్ సినిమాకు హైలైట్‌గా నిలిచింది.

గతంలో ‘బిచ్చగాడు'లో కూడా..

ప్రధాని నరేంద్ర మోదీ సారథ్యంలోని కేంద్ర ప్రభుత్వం గతంలో రూ. 500, రూ. 1000 నోట్లను రద్దు చేసిన విషయం తెలిసిందే. దాని కంటే ముందే ఈ పరిస్థితిని ‘బిచ్చగాడు' అనే సినిమాలో చూపించారు. దీంతో అప్పట్లో ఈ సినిమా కూడా బాగా చర్చనీయాంశం అయింది.